Namar kiba bun ki jingduna ha Parïong PHC leit ïakynduh ki nongïalam ka HYC ïa u MHO

Mairang, Risaw 08: Ka Parïong Primary Health Centre Eastern West Khasi hills district ka dei ka jaka sumar kaba peit ïa bun phew tylli ki shnong kynthup ruh ïa ki shnong kiba hap hapoh ka South West Khasi hills district hynrei ki dang bun ki jingduna ha katei ka jaka sumar.
Kumta halor kiba bun ki jingduna ha kane ka sngi palei ka 8 tarik Risaw ki nong ïalam ka Hynñewtrep Youth Council Parïong area ki la leit ban jurip ïa katei ka jaka sumar bad ïakynduh ruh ïa u Medical & Health Officer.
U Vice president jong ka seng haba ïakren bad u nongthohkhubor u la ong ba ka jingleit ïakynduh jong ki ïa utei u Ophisar ka dei hadien ba ki paitbah ki la pynsgew ha ki nongïalam ka seng halor ka jingbym biang jong ka jingtrei kam ha katei ka jaka sumar.
Utei u nongïalam ka seng u la ong ruh ba ha katei ka jingleit ïakynduh jong ki ïa utei u ophisar ki la aiti ruh da ka jingthoh ban kyrpad ïa u ba un pynsgew sha ka sorkar ba kan pynbiang noh ïa baroh ki jingdonkam ha katei ka jaka sumar kata naduh ki Nurses, bad kiwei kiwei ki nongtrei.
Ha kajuh ka por u la ong ba ka jaka ba katei ka hospital ka don wat la ka dei harud ka surok bah Nongshilong – Jakrem ruh ka dei kaba kham kynjah ha ki por mynmiet namar ka dei harud shnong kumta kam da long kaba shngaiñ lada ki Nurses kynthei kiba trei ha katei ka jaka sumar kin sah ha ki quarter wat la la ker fencing ruh.
Ha kaba ïadei bad ka jingbym biang jong ki nongtrei utei u nongïalam ka seng u la ong ban a ka bynta ka jingshngaiñ jong ki Nurses kiba sah ha ki quarter jongkatei ka hospital la idon kam ban thung biang sa uwei u Chowkidar lane u nogtrei shynrang uba dei ban sah ha katei ka juh ka jaka ha ki quarter ba la dep don lypa.
Ha katei ka sngi ha shuwa ba ki nongïalam ka HYC kin wan poi ha katei ka jaka na ka liang u Nongthohkhubor jong u Mawphor u la ïoh ban ïakren bad u Doktor L.S.L.Kharkonngor uba dei u Medical & Helath Officer jongkatei ka jaka sumar ha kaba u la ïathuh ba ha katei ka jaka sumar don tang ma u marwei u doctor MBBS bad ka kam ka long kaba khia haduh katta katta namar ki shnong kiba hap hapoh ka jingpeit jogn katei ka PHC ki dei ki shnong kiba heh suda bad ka jingbun briew ruh ka la kiew sted ha kine ki snem.
Nalor kata u la ong ba ki don haduh hynñiew tylli ki Sub health centres kiba hap ha ka jingpeit jong u nalor kata ki don s alai tylli ki Sub health centres kiba ka jingpynbit pynbiang ka dang ïaid shait shait kumta ka jingtrei ka long kaba khia haduh katta katta.
Ha kajuh ka por u la ong katei ka jaka sumar ka la don kam palat ban pynheh bad ban pynbun shuh shuh shuh ïa ki jingthiah na ka bynta k I nongpang namar haduh mynta ki jingthiah nongpang ki dang don tang shiphew tylli kumta ka shem shitom bha lada ki nongpang kiba wan pah sumar ha katei ka jaka ki bun.