Ka RBSM 2.0 ka rynsan ban pyni ïa ki mar bad ka jingpynïadei bad ka kam khaïi pateng: Dy.CM

Shillong, Risaw 8: Ha ka sien kaba ar jong ka Reverse Buyer Seller Meet (RBSM 2.0), kaba la pynlong da ka tnad Commerce and Industries jong ka sorkar Meghalaya, la plie paidbah ha State Convention Centre hangne ha ka sngi Palei, ha kaba la lum lang ia ki nongsengkam na baroh ki 12 tylli ki district jong ka jylla Meghalaya ryngkat bad ki nongthied nongpet napoh ri bad nabar ri.
Kane ka jingthmu kaba ar sngi ka long ban thaw ïa ki lad kamai thymmai bad ki lad shalan mar shabar ri na ka bynta ki Micro, Small and Medium Enterprises (MSMEs) jong ka Jylla, ban ai ïa ki ka rynsan ban pyni ïa ki mar jong ki, ban sngewthuh ïa ki jingdonkam jong ka ïew bad ban pynlong ïa ki jingïadei ba beit ha ka kam khaïi.Palat 300 ngut ki nongseng kam seng jam ki ïashim bynta ha kane ka jingialang, ha kaba 32 ngut ki nongthied na ka ri bad nabar ri ki wan sha kane ka jingialang.
Haba kren ha kane ka jingialang, u Symbud Myntri Rangbah ka Jylla Bah Sniawbhalang Dhar u la ong ba ka RBSM 2.0 ka long kham palat ban ïa ka jingïalang plie, da kaba batai ïa ka kum ka rynsan ban plie ïa ki jingkhang ba thymmai jong ki lad ki lynti na ka bynta ki nongseng kam seng jam jong ka Meghalaya bad ban pynïasoh ïa ki mar jong ka Jylla bad ki ïew ha kylleng ka ri India bad ka pyrthei.
Haba pdiang sngewbha ïa ki nongthied bad ki nongseng kam seng jam kiba ïashim bynta, u Bah Dhar u la ong ba ka jingdon jong ki karkhana na baroh 12 tylli ki district ka pyni ïa ka jingshaniah kaba nangroi jong ki nongkhaïi jong ka Meghalaya bad ka jinglong ba kloi jong ka ban ïatreilang bad ki iew kiba kham heh.
U la pynpaw ïa ki mar rep jong ka Meghalaya, ki jingthaiñ kti bad ki rukom shna jain, ki marpoh khyndew bad ki mar khlaw, ki nongtrei kti kiba tbit bad ki mar ba kyrpang kum ki jingkhlain kiba kongsan ïa ka jingroi jong ki kam bad ka jingroi ha ka ïoh ka kot kaba neh.
U Bah Dhar u la pynksan ruh ïa ka jaka ba kongsan jong ka Jylla, kynthup ïa u pud u sam jong ka bad ka Bangladesh uba jrong 443 kilomitar bad ka jinglah jong ka ban long kum ka khyrdop sha ki ïew ki hat ha ka thaiñ Shathie bad Shathie Mihngi jong ka Asia.U la kdew ïa ka jingpynheh ïa ka surok, ka jingpyniasoh lynti rel lyngba ka Mendipathar bad ka jingpyniasoh liengsuin lyngba ka kad liengsuin Umroi kum ki jingtei kiba kongsan kiba kyrshan ïa ka jingroi jong ka khaïi pateng bad ki karkhana.
U la ong ba ki jingmyntoi ba kynja mariang jong ka Meghalaya, ryngkat bad ka jingroi jong ka MSME ecosystem, lah ban pynkylla sha ki lad kamai kiba kham heh da kaba pynkhlain ïa ka jinglah ban ïoh ïa ki iew ki hat, ka jingpynpaw kyrteng, ka jingbha bad ka jingiadei ha ka kam khaïi.
“Da ki snem, bun na ki mar ba bha tam jong ka Meghalaya ki la sahkut tang ha ki iew ki hat jong ka ri bad ki thaiñ.Hynrei mynta ka sngi, ngi dang trei ban pynkylla ïa kata ka jingshisha.Ka jingthmu jong ngi kam dei tang ban pynmih kham bun, hynrei ban pynïaid iew kham bha, bad ban poi sha ki nongthied ha kylleng ka ri India bad shabar ri,” ong u Bah Dhar.
U la ong ba ka RBSM ka dei ka rynsan kaba kongsan ban pynsuk ïa ka kam kaba pynlah ïa ki karkhana trai ri ban iakynduh beit beit bad ki nongthied na ka ri bad nabar ri bad ban ïoh ïa ka jingsngewthuh kaba kham bha ïa ki jingkhmih lynti jong ka iew.
Haba phai dien bad ka International Reverse Buyer Seller Meet kaba nyngkong eh kaba la long ha u bnai Rymphang mynta u snem, u Bah Dhar u la ong ba kane ka jingthmu ka la wanrah ïa ki 40 tylli ki MoU jong ki kam bad ka la pynmih ïa ki lad ki lynti kiba shongdor palat T.3 klur, ha kaba la ïashim bynta da ki nongthied na ki 15 tylli ki ri.
U la ong ba ka jingmih na kaba nyngkong ka pyni ba kum kine ki rynsan ki lah ban pynkylla ïa ki jingiadei kam sha ki lad ki lynti kiba lah ban ïohi bad ka ai jingkyrmen ban pynlong ïa ka RBSM 2.0.U la kyntu ïa ki nongseng kam kiba ïashim bynta ban pyndonkam pura ïa ka rynsan, ban pyni ïa ki mar jong ki da ka jingshaniah bad ban ïatreilang bad ki nongthied kiba wan jngoh khnang ban ïoh jingtip shaphang ki iew bad ki rukom treikam ba thymmai.
U Bah Dhar u la pynpaw ruh ka jingsngewnguh ïa ka Sorkar India halor ka jingkyrshan jong ka bad ong ba ka Sorkar Jylla ka dang trei ban pynbud ïa ki jingthmu kiba kum kine hapoh ka Jylla Meghalaya ban ai ki lad ki lynti kiba neh na ka bynta ki nongseng kam lajong.
U la pynshlur ïa ki nongseng kam seng jam ban peit ïa ka kam kum ka jingpule kaba bteng bad ban ym shah pynduh mynsiem ha ki jingshah pynphaidien.U la ong ba ka jingroi kaba neh ka donkam ïa ki nongseng kam seng jam ban nang, ban pyniadei bad ban iaid shakhmat kawei hadien kawei pat.
La khmih lynti ba ka RBSM 2.0 kan nang pynkhlaiñ shuh shuh ïa ki jingïadei bad ki ïew ki hat na ka bynta ki MSME jong ka Meghalaya, ban kyntiew ïa ki mar ba la pynmih hapoh ka ri shabar ka Jylla bad ban thaw ïa ki lad ki lynti kiba thymmai na ka bynta ka kam khaïi, ka jingbei tyngka bad ki lad shalan mar shabar ri.