Bun ki khynnah skul ki pep noh shiteng por ba kiew dor palar ki marbam, ong u MLA Mawphlang

Shillong, Nailur 22: U MLA ka Mawphlang u Bah Mathew Kurbah mynta ka sngi u la wanrah ha ka jingtip ka Ïingdorbar lyngba ka kynta jingkylli ba na ka daw ka jingkiew dor ki marbam mardih namar ka jingduna u khaw ka la pynlong ïa kiba bun ki Khynnah ban pep skul noh shiteng por bad pynkha roi ruh ïa ki jingsniew ha ka Jylla.
U Bah Kurbah u kwah ban tip katno sien ka tnad food and civil supplies ka la leit khynra ïa ka jingdie tuh ïa u khaw bad kiwei ki marbam..
Na ka Liang u Myntri u Bah Comingone Ymbon u la ïathuh ba la ju pynlong ïa ka jingkhynra ia ki dukan ha Ïewduh, Laitumkhrah, Rynjah bad kiwei kiwei de ki jaka.
Ha kane ka jingiabuh jingkylli la mih ruh ka jingwad jingshai na u Saleng halor u khaw plastik nangta ka jingkiew dor ki marbam mardih bad u Saleng uba dei u MLA ka Congress u la ong ba ka jingkiew dor ka la kham jur hadien ba la dep ka elekshon MLA mynta u snem. Ha kane ka jingwad jingshai u Saleng u la kylli ruh kaei ba ka sorkar ka la leh halor u khaw plastik ba u la wanrah nuksa ha ka sien shong dorbar baladep bad ong ruh shano ka sorkar ka buh ïa une u khaw ba ka khlem test ïa u. Kane ka jingong u Saleng ka long hadien ba u Myntri ka tnad sam marbam u la ong ba lada ki dkhot ka ïing ki ïoh jingtip ne ki paidbah ki lap ïa uba kum une u khaw kidei ban wanrah sha ka tnad treikam jong ka sorkar khnang ba kan ïoh ban test. U la pynshai ruh ba une u khaw plastik ba ki paidbah ki ïa ong ha ka jingshisha udei uta u fortofied rice ne u khaw ba la khleh vitamin.
U Bah Ardent Basaiawmoit u la kylli hato ka jingkiew dor kadei nabar ba don kiba dawa pisa ne ka extortion?
U Myntri u la iathuh ba ka ju don ka jingleit khynra da kaba pyndonkam ruh da ki mobile app.