Na ka Tnad Political bad Law pan jingpynshai ka Health ba ai PPRC ki District ban leit pule MBBS

Shillong, Nailur 22 : Ka Myntri ka Tnad ka Koit ka Khiah Kong Ampareen Lyngdoh ha ka sngi Thohdieng ka la pyntip ba ka Tnad ka la pan ïa ka jingpynshai na ka Tnad Home (Political) bad ruh ka Tnad Law halor ka rai jong ki katto katne ki District ban ai ïa ki Provisional Permanent Residency Certificate sha ki samla pule MBBS jong ka Open Category.
Haba wanrah ïa ka statement hapoh ka ïing Dorbar ba ïadei bad ka call attention notice u MLA ka North Shillong Bah Adelbert Nongrum, ka kong Ampareen ka la ong “ Namar ka jingbym long shai bha halor ka bynta jong ki bor district haba ïadei bad ka jingai ïa ki Permanent Residency Certificate, namar don katto katne ki District ki la ai ïa ki Provisional PRC sha ki samla pule Open Category dang shen, la rai ban phah ïa kane ka kam sha ka Tnad Home (Political) bad ruh sha ka Tnad Law ban pan jingpynshai”.
Ka Kong Ampareen ka la ïathuh ba ka tnad mynta ka dang ap sa ïa ka jingpynshisha ïa 2 ngut ki kyrtong kiba shah jied ban leit pule MBBS na ka bhah pule ka Jylla.
Ka Meghalaya ka la ïoh 92 seat mynta u snem bad sa ar seat napoh ka central pool. Napdeng kine, 52 seat ki dei na ka central pool, 13 RIMS, Imphal, 14 NEIGRIHMS Shillong, 3 Tripura bad 10 ha Assam.
Ka kong Ampareen ka ong ba kat kum ka jingkam nongshong shnong da ki kyrtong, la bthah ïa ki Deputy Commisssioner ba kin pynshisha ïa ka jinglong trai shnong ba pura jong ki.
Ka pyntip ba ka Tnad ka la ïoh pdiang ïa ki kaiphod na ki DC bad dei halor kine ki kaiphod bad ki kot ki sla ba la ai, ka Tnad kala pynmih ïa ka jingai bhah pule MBBS ha ka 31 tarik Nailar, 2023 bad hadien ka jingïoh biang sa 2 seat na ka central pool, ïa kane ka jingai seat la pynthymmai biang ha ka 4 tarik Nailur 2023.
Ka Myntri ka ong ba hadien ka jingïoh pdiang ïa ki jingujor na ki katto katne ki kynhun Sengbhalang, ka Tnad ka Koit ka Khiah ka la pynmih ïa ka jingpynbna ha ka 6 tarik Nailur 2023, ba pynsangeh ïa ka jingai bhah pule jong ka Open category kat bym pat lah ban pynshisha ïa ka jinglong trai shnong jong ki kyrtong kat kum ka OM ka Tnad Home (Political) ba pynmih ha ka 10 tarik Jylliew, 1983.
Ki phra ngut ki samla pule ba shah jied ha ka Open category ki kynthup ia u Mehbub Hassan, Monimul Ekram Mondall, Mahmudul Islam, Atida Zaman, Chiranjit Kumar Paul, Angoor Zaman Hoque, Abul Kala, Golam Mahdi Alom bad Ayush Kumar.
Kat haduh ka 21 tarik Nailur, ka jingpynthikna ïa ka jaka sah jong ki hynriew ngut ki samla pule kala wan poi. Kine ki kynthup ïa u Mehbub Hassan, Md Mahmadur Islam, Atifa Zaman, Chiranjit Kumar bad Angoor Zaman Hoque kiba la ai ïa ka PRC na ka bynta ka higher education bad training ba la ai da u SDO Dadenggre sub-division West Garo Hills bad u Ayush Kumar uba la ai ia ka PRC ba la ai da u DC ka East Jaintia Hills.