Ngan sa bishar halor kiei ki kyndon phah Legal Notice u Lalremsanga ïa nga : Dr Mukul

Shillong, Nailur 22 : U Nongïalam ka AITC bad Myntri Rangbah barim ka jylla u Dr Mukul Sangma ha ka Sngi Thohdieng, ula ong ba un sa shong bishar ba hapoh kaei ka kyndon jong ka aiñ ba la ai ‘Legal Notice’ sha u da u Henry Lalremsanga, u Chairman ka 2B’s Group of Companies.
U Dr Mukul haba ïakren bad ki nongthoh khubor, ula pyntip ba um pat ïoh pdiang ïa kane ka legal notice.
“Namar kata, ngan ap ïa ka. Ngan sa peit kaba kumno kata ka legal notice ba la ai bad kaei kata ka kyndon aiñ kaba u (Henry) la phah sha nga ïa kane ka notice. Ki don katto katne ki kam kiba ki kynhun ïasaid aiñ jong ki kin tip, ngin sa ïakhmih bad ki yn da la poi ka por” ong u Dr Mukul.
Haba kylli la kane ka legal notice ka shong nongrim ban ai pyrshah ïa ka hok jong u Dkhot ka ïing Dorbar, u Myntri Rangbah barim ula ong “Ta ka daw nga ong ba hapoh ka kyndon aiñ aiu ba u (Henry) u ai ïa katei ka lad ban phah sha nga ïa ka legal notice”.
Ka legal notice ba la phah da u Bah K Kharmawphlang, Legal Counsel ba mihkhmat ïa u Henry Lalremsanga, kala dawa ïa u Dr Mukul ban panmap khlem kyndon hapoh ka 7 sngi ba kynnoh ïa u Henry kum u ‘Kingpin’ khaïi droks. Ka la dawa ruh ïa u Dr Mukul ba un siew ïa ka bai mynraiñ khmat ba 20 klur tyngka hapoh ka 7 sngi ba ïoh pdiang ïa kane ka notice.
Kane ka legal notice ka dei kum ka sienjam pyrshah ïa ka jingkren u Dr Mukul ha ka 19 bad 20 tarik Nailur.
Haba ban biang ba ka jingkren jong u hapoh ka ïing Dorbar ka dei tang ka jingai jingmut ïa u Myntri Rangbah, u Dr Mukul ula ther pat ïa u Myntri Rangbah ba ula rah ïa kane ka kam shabar ka ïing Dorbar ban u la ai jingmut ba ïa kane ka legal notice la dei ban phah sha u Myntri Rangbah .
“Hapoh ka ïing Dorbar, ka jingkren jong ka ka la shai bha. Ka la long eh kum ka jingai jingmut ïa u Myntri Rangbah. Dei tang u Myntri Rangbah uba la kren ïa kane shabar ka ïing Dorbar. U dei ban phah ïa ka legal notice sha u Myntri Rangbah” ula ong.