Shillong, Nailar 16 : U Nongïalam ka Liang Pyrshah ha Iing Dorbar Thawaiñ ka Jylla, Bah Ronnie Lyngdoh ha ka sngi Balang u la ong ba dei ban pyntreikam noh ïa ka National Education Policy (NEP) ha ka jylla na bynta ka jingmyntoi ka lawei jong ki samla pule ka jylla.
Shwa kane, utei u rangbah u la ïathuh ruh ba u la dep ban ïa syllok bad bun bha ki riewshemphang kiba la pynpaw ba ki kyrshan ïa ka NEP hynrei u la ong pat ba um pat da ïohlad than pat ban ïa syllok bad kito kiba pyrshah pyntreikam ïa ka.
Haba kren bad ki lad pathai khubor, u Bah Ronnie uba dei ruh u nongïalam ka Congress u la ong ruh haba ym don la ka jong ka State University ka eh haduh katta katta ban ïa kren khamtam kum ha Meghalaya kaba baroh ki jaka pule ki hap ban pynïasoh sha ka skulbah NEHU.
“Bun ki samla pule kiba la pyndep ïa ka Graduate bad Post Graduate kim ïoh kam namar ka jingpule kam ïahap bad ka jingdawa ka kam,” u la ong. Nalorkata, u ïathuh ruh ba ha ka NEP ka don ka Multidisplinary kaba mut ba ki samla ba pule ha kano kano ka laiñ ki lah ban shim lang ïa kano kano ka sobjek kaba don jingkyrmen ban ïoh kam.
“Peit mynta wat ki Doctorate ki dang wad kam ka bym ïahap shuh bad ka kyrdan jong ki. Wat kito kiba heh kyrdan ki dang aplai ïa ka kam LD,” la bynrap biang u Bah Ronnie. Kumta u la banjur ba ka por ka la dei ban sdang pyntreikam noh ïa ka NEP na bynta ka lawei jong ki samla.
Haba kren pat halor ka jingpyrshah jong ki Principal bad ka kynhun ki samla pule ba ki dang bun ki jingduna kum ki jingtei lada pyntreikam noh mynta, utei u MLA u la ong ba lada ym sdang mynta yn ym lah ban pynbiang jingdonkam.
“Lada dei ka skim jong ka sorkar pdeng dei ban thoh sha sorkar India namar lada ym sdang lano lano yn ym lah shuh ban sdang. Hap ban pyrkhat ïa ka lawei ki khynnah kan kham myntoi lada treikam noh,” u la ong.
Katkum ka jingong jong u, ka NEP ka donlang ruh ïa ka Vocational kaba mut ba kan donlang ka sobjek wat ban hikai ïa ki jaitkam. Ha kajuh ka por u la pynpaw ruh ba um sngew ïahap ban bteng pan na ka sorkar India ban pyllait shwa ïa ka jylla na ka jingpyntreikam ïa ka NEP.
