Jowai, Nailar 16: Ka kynhun jong ka Regional Committee hapdeng ki ar tylli ki jylla Assam bad na Meghalaya lyngba ka West Jaiñtia Hills mynta ka sngi ki la hiar sha ka shnong Khanduli ban ïakynduh lang halor kumno ban wanrah ïa ka jingshongsuk shongshngaiñ kumba long ha ki por mynshwa bad ban pynbeit kloi ïa u pud u sam hapdeng kine ki ar jylla.
Na ka liang ka Regional Committee jong ka West Jaiñtia Hills la ïalamkhmat da u Symbud myntri Rangbah u Bah Sniawbhalang Dhar ha ryngkat u Bah Comingone Ymbon, u Nujorki Sungoh, u Deputy Commissioner jong ka West Jaiñtia Hills u Bah B.S. Sohliya, u Superintendent of Police ka District u Bah C. Syrti, u Chief Executive Member (CEM) ka Jaiñtia Hills Autonomous District Council (JHADC) u Bah Thombor Shiwat nalor kiwei de.
Katba na ka liang jong ka Assam la ïalamkhmat da u Myntri Sorkar u Piyush Hazarika, u MLA u Rupsing Teron, ka DC bad u SP ka West Karbi Anglong.
Ha kane ka jingïakynduhlang na ka liang ki nongïalam shnong ka Khanduli lyngba u Waheh Shnong ma Yoshida Nongspung ki la aiti ïa ka dorkhat ha u Symbud Myntri Rangbah u Bah Sniawbhalang Dhar.
Kine ka kynhun Regional Committee ki la leit jngoh ruh ïa ka jaka ba don ka Entry Tax Gate bad kumjuh haduh khappud (Zero Point) ka Khanduli.
U Welcome Teron haba ïakren bad ki lad pathai khubor ula ong ha ka por ba long Myntri Rangbah u Captain W. Sangma ki la kwah ban wanrah ïa ka Khanduli kumjuh ïa ka a Block-I bad Block-II shapoh ka Meghalaya da kaba ong ruh ba ki jaitbynriew Pnar haba ki thied jaka ki la pynbiang ïa ki kot ki sla napoh ka JHADC.
U Piyush Hazarika ula ong ba ka jingwan jong ki mynta ka sngi sha Khanduli ka long na ka bynta ban leit rah ïa ka bui sha ka Sorkar Assam bad Sorkar Meghalaya ban ïakren sani halor kane ka phang shaduh ka Sorkar Pdeng da kaba pynpaw ba ki jaitbynriew Karbi bad ki Khasi Pnar ki long kum shi para.
U la pynsngew mynta na ka liang ki nongshong shnong ka Karbi bad Khanduli kaba don ka jingkhang ïa ka rung ka mih hapdeng jong ki bad ïa kane yn lah ban weng noh kumba ju long ha ki por mynshwa.
