Nongpoh, Naitung, 30: Da ka mynsiem ba sngewkhia halor kawei ka jingjia ba sngewsih ba la mad da kawei ka longiing ha ka shnong Mawiapbang ha Ri-Bhoi District, hadien ba ki thylliej ding kiba la klang ki la bam duh syndon ïa ka iing ka sem bad ki jingdon jingem baroh, ka seng Hynñiewtrep Integrated Territorial Organisation (HITO) Ri-Bhoi District ka la leit ban ai jingïarap bad noh synñiang sha katei ka longiing kum ka jingai mynsiem bad kyrshan. Kum ban shu pyntip hangne ba ka ding kaba la klang ka la bamduh ïa ka ïing jong ka kong Bashisha Pyngrope ha ka step jong ka 19 tarik mynta u bnai haduh ba baroh ki jingdon jingem ki la ingkhong bad kylla dpei lut, kaba la wanrah ka jingsngewsih kthang ïa katei ka longiing.
Na ka liang jong ki nongïalam ka HITO Ri-Bhoi District ki la pynpaw ïa ka jingsngewkhia halor kane ka jingjia ka bym poi pyrkhat kaba la wanrah ka jingduh-nong kaba khraw ïa kane ka longiing.
Kum ka jingai mynsiem bad ka jingkyrshan naka liang ka seng ka la noh synñiang katba lah da ka bor barit sha kane ka longiing bad ha kajuh ka por ka Seng ka la kyrpad ruh ïa ki bor ba dei peit khamtam u Block Development Officer (BDO), ïa ki riewshimet kiba don ka mon babha ba kin ïa snohkti lang na ka bynta ban kyrshan ïa kane ka longiing ha kum kane ka por ba ka la mad ia ka jingjia basngewsih.
