Khlad u nongñiah thuk thuk na ka jingïatakhuh kali hajan Civil Hospital

Mawkyrwat, ‘Naitung, 30: Uwei u briew uba ha ki karta 23 snem ei ei u la khlad noh hadien ka jingjia takhuh kali ha ka surok bah Mawlangwir – Mawkyrwat ha kaba ka jingjia ka la jia ha kawei ka jaka (surok) kaba don hajan ka Civil Hospital, Mawkyrwat, South West Khasi Hills District.
Katkum ka tyllong khubor na ki bor pulit la ïathuh ba kane ka jingjia ka la jia ha ka 30 tarik u ‘Naitung, 2023 ha ki por kumba 2:30 janmiet ha kaba kawei ka Pulsar ba rong ïong kaba don ruh ïa u number ML 05 E 7511 ba la ñiah da u Ialambok Lyngdoh na Mawlangwir ka la wan na ka phang Mawlangwir ban kiew sha Mawkyrwat bad kynsan ynda ka la poi hajan ka Civil Hospital, Mawkyrwat ka la ïa takhuh noh bad kawei ka kali kamai Maruti Alto 800 kaba don ïa u number ML 12 2962 ba la ñiah da u Jonalin Wartde, 23 snem na ka shnong Pyndensakwang ha kaba kane ka kali ka wan na ki phang Mawkyrwat.
La ïathuh ruh ba kane ka jingïa-takhuh kali, uwei u briew uba dei u nongshong ha ka ar-shaka u (Late) Shemphanglin Lyngdoh, 23 snem na ka shnong Mawlangwir u la don ha ka jingmynsaw jur bad mar mar la rah noh hapoh CHC Mawkyrwat bad tang katto katne por na ka daw jong ka jingjur palat ka jingmynsaw u la khlad noh.
Halor kane, ïa ka daw jong ka jingjia haduh mynta ym pat lah ban tip la ka dei ka jingbakla jong ka kali ar-shaka ne dei jong ka Maruti Alto 800. Kumta na ka liang ki bor pulit ki dang pynlong jingtohkit kaba bniah.