Guwahati, Naitung 30 : U Myntri Rangbah ka Jylla Assam u Himanta Biswa Sarma u la ong ba ka jingrung jong ki jaidbynriew Rohingya na Myanmar ha ka thaiñ Shatei Lam Mihngi ka Ri, ka long kaba ishyrkhei.
Ha jingïakren bad ki lad pathai khubor, u Himanta ula ong “ka don ka jingtreikam jong ki briew kiba wanrah ïa ki Rohingya sha Tura bad nangtei pat sha Assam bad sha kiwei ki bynta jong ka Ri. Ki Pulit jong ngi ki la don ha Tripura bad ki la ïatreilang bad ka Sorkar Jylla ban leh eiei pyrshah ïa kine ki briew”. Ki Pulit ka Tripura lyngba ka Twitter, hadien ba u Himanta u la kren halor ka kam ki Rohingya ha Assam bad ong ba tad haduh u bnai Jylliew, na baroh ki 354 ngut ki nongwei ba wan rung kynthup ki Rohingya, ki Pulit ka Tripura ki la kem ïa ki briew kiba ïarap.
