Nongpoh, Naitung 20: Ka seng ki nongñiah thuk thuk bala tip kum ka The Ultimate Legend Bikers Association (TULBA) jong ka Eastern Zone mynta ka sngi kala lum ïaki skul haka thaiñ Umroi ban pynphriang ïaka khubor halor ka jingma u drok bad ka shongkha khynnah kaba la long kum ki kruiñ kiba bam duh ïaka ri bad ka jaitbynriew, ha kaba bun naki khun samla ha kane ka juk ba mynta ki ngop haki jingdih buaid khamtam u drok, kaba pynlong ïa shibun ki iing ki sem ban jot ban pra bad khamtam kaba wanrah ruh shibun ki kam sniew haka imlang ka sahlang haka jingïalang kaba la long ha Umroi Madan.
Ïa katei ka prokram ai jinghikai la snohkti lang ruh da ka tnad pulit jong ka Ri-Bhoi, ka tnad ka koit ka khiah, ki nongthoh khubor ha kaba la sakhi da ka jingdon ryngkat lang jong u Bah PS Marweiñ DSP Crime ka Ri-Bhoi District, Suraj Bairely OC ka Umiam Police Station, Bah PB Sylliang Secretary ka Synjuk ki Rangbah Shnong Ri-Bhoi, Bah Cornelius Laloo uwei naki nongthoh khubor bala kham rangbah ryngkat bad ka kynhun, Samla M Tariang u ba la wan ban mihkhmat na KRIPA Foundation Nongsder u ba dei wei naki samla bala shah pyngop bad ngat ha tyrsim jong u drok la bun snem, hynrei da ka jingïeid u Blei utei u samla u la kylla long u nongpynphriang khubor halor ka jingma u drok bad u la long ruh u nongïarap ïa kito kiba la ngop ha utei u jingdih buaid, ki nongtrei na Bhoirymbong CHC bad kiwei kiwei ki riew rangbah ba kynthup naduh ki nonghikai bad ki khynnah skul.
Naka liang ki nongkren ha katei ka sngi, kila kren halor shibun ki phang bad ka jingma jong u drok bala kynrei naduh sor haduh nongkyndong, kaba la ap jingma ïaki khun samla jong ka jaitbynriew lada ki kmie ki kpa kim don jingkitkhlieh ïala ki jong ki khun bad kaba donkam mynta ka long ban rat dieng khong ïa utei u jait jingdih buaid da ka jingïatreilang naduh ki nongïalam shnong, ki longkmie ki longkpa, ki khun samla bad ki bor pulit.
Shuh shuh kila sneng la kraw ruh ïaki khynnah pule kiba la poi ha katei ka sngi ba kim dei ban ktah ïa utei u jait jingdih bad ban kiar lai lum lai wah namar shisien bala ktah la eh ban bthat ïa u kynjri, namar bun naki khun samla ha kane ka juk ba mynta ki kloi ban tare kulmar ïaki jingsniew tang naka jingkynduh bad ki paralok, ha kaba kum ki khynnah pule ki donkam ban jied kino ki jait paralok kiba lah ban lam ïaki shaka jingbha bad kino kino lah ban pynjot thiaw ïaka jingim.
Namarkata, kumba la sakhi ba utei u jait jingdih u la rung ha man la ki thliew ïing, kala dei ka por ba donkam ban rat diengkhong ïa utei u jait jingdih bala pynïasyriem ruh kum u mrad kynsha bad kum ki samla kim dei ban ktah bad um dei ban rung sha ki thliew iing hynrei ba ki kum ki samla kiba don ka jingkitkhlieh bad ka thong haka jingim ki dei ban kiar bad kloi ban on gem ïa utei u jait jingdih.
