Nongstoiñ, Naitung 20: Ka KSU Rimuliang Circle ha ka sngi palei jong ka taiew hapoh ka jingïalam jong u President Ri muliang Circle Samla Biangboy Sangriang, ka la ïoh ban leit jurip ïa ka Ri-Muliang C&RD Block. Ka jingleit jurip ka long hadien ka jingud ki paidbah ba katei ka bank kam treikam bha satia.
Ha katei ka jingjurip, na ka liang jong ka Seng ka la lap ba katei ka office treikam ka plie tang ka ka sngi iew kata ha ka sngi palei. Hynrei wat ha ka sngi iew ruh ka seng ka lap ba ki paidbah ki la ap ban wan donkam ha katei ka office, hynrei haduh 2 baje janmiet ruh ka office ka dang khang dam bad ym shym la don wat uwei u nongtrei ruh.
Kumta na ka liang jong ka seng ka dawa ba ka sorkar kan buh ïa u BDO ba pura u ba treikam hok. Dei ruh ban plie ïa ka Office naduh ka sngi nyngkong haduh ka sngi thohdieng bad ruh ka por kan long kumba kiwei pat ki office ki plie.
Lah ban pynkynmaw ba ka sorkar ha ka 22 tarik u Naiwieng 2022, ka la plie ïa katei ka Block da kaba pynbna ruh ba ki jingdonkam baroh ha katei ka ophis kin long kumba dei ban long, na ka bynta ban pynsuk ïa ki paidbah jong katei ka thaiñ. Hynrei, kumba la lap da ka KSU bad ka jingud ki paidbah, ka rukom treikam jong katei ka Block kam shym la ai jinghun satia ïa ki paidbah, namar wat tang u BDO ba pura ruh ym don.
