Nongpoh, Naitung 20: Ka skulbah University of Science and Technology mynta ka sngi kala ioh ban plie sa kawei pat ka Block ha katei ka shlem pule bala ai nam haka kyrteng u Dr. DD Lapang u ba dei ruh u Myntri Rangbah barim ka jylla bad u nongaibuit ba rangbah jong ka sorkar jylla bala tip kum ka Dr DD Lapang Block ba la leit ban plie paidbah hi da u Dr DD Lapang kum u kongsan.
Ha katei ka sngi la sakhi ruh daka jingdonlang u M Hoque Chancellor ka USTM, Bah Donlang Sohkhlet Vice Chairman MREGC, Bah RB Shadap President ka Ri-Bhoi Dorbar bad kiwei kiwei ki riew rangbah haka jingdonlang ki nonghikai bad ki samla pule.
Naka liang u Chancellor katei ka skulbah u M Hoque u la pynpaw ba ka naka liang ka skulbah kala ai nam ia katei ka building haka kyrteng jong u Dr. DD Lapang ka dei shibynta ban ai nam bad burom bad sngewnguh shikatdei halor u synñiang bad u bynhei ba utei u rangbah u la noh bad shakri haka jylla Meghalaya ha kaba u la pynpaw ruh ba u Dr DD lapang u dei uwei naki riewkhraw bala noh shakri bad noh synniang shibun sha ka imlang ka sahlang naduh ba u dang samla haduh rta ka jinglong tymmen ba um pat shym la shongthaid ban shakri iaki paidbah bad kane ka dei ka nuksa kaba bha ha kane ka pateng ba mynta.
U Dr. DD Lapang haba kren ha katei ka sngi u la pynpaw ka jingsngew kmen kaba khraw hadien ba ki bor pynïaid jong ka skulbah USTM kila kloi ban ainam ïa katei ka building haka kyrteng jong u da kaba jer kyrteng kum ka Dr DD Lapang Block ha kaba katei ka skulbah mynta kala kiew shaphrang bad dei ruh kawei naki skulbah kaba paw haka thaiñ Shatei Lam Mihngi da ka jingtrei shitom jong ki bor pynïaid bad ki nonghikai.
U la ong ruh ba kum u nongmihkhmat bala rim haka jylla u la kular ban don ryngkat bad katei ka skulbah la ka dei ha kano kano ka bynta ban kyntiew ïaka jingnang jingstad, namar ka jingdon katei ka skulbah kala long shisha ka jingkyrkhu kaba khraw ïaki samla pule naka thaiñ shatei lam mihngi ba kin bteng ïaki jingpule ba kham shalor.
Naka liang u Dr DD Lapang u la kyntu kynpham ruh sha baroh ki samla pule ba kin minot thop haki jingpule jong ki la ka long ha kano kano ka liang bad ka kyrdan pule bad khmih lynti ba ki samla ha katei ka skulbah kin poi sha ka thong kumba ki angnud haka jingim jong ki.
