Jowai, Naitung 10: Ka Khasi Students’ Union (KSU) East & West Jaiñtia Hills District Unit mynta ka sngi la leit ban ai da ka jingthoh ha u Chief Executive Member ka Jaiñtia Hills Autonomous District Council (JHADC) ban kyntu jur na ka Council ban kan nym ai ïa ka Syrnot ai jingbit (NOC) halor ka jingthmu ban wanrah ïa ka lynti rel lyngba ka East Jaiñtia Hills.
Katkum katei ka shithi ba ka seng kala ïoh ban aiti mynta ka sngi ha u Deputy CEM ka JHADC ma Laski Rymbai namar ba u CEM um don ha ophis treikam, da kaba pynsngew ha u ba ka sorkar kala pyrshang ban wanrah ïa ka lynti rel lyngba ka NFR shapoh kane ka rilum Jaiñtia.
La ïathuh ba ka seng naduh ki snem 1988 kala ïeng skem haka nongrim ban pyrshah ïa ka jingwan ka lynti rel shapoh ka jylla namar ka seng ka ïohi jngai ba kan don ka jingwan buhai shnong bad rung khyrthep ki mynder sha kane ka ri kaba dap da ka dud bad ka ngap.
Kumta ka seng ka dawa ba dei ban pynsangeh mardor ïa kane ka mat wanrah lynti rel shapoh ka Ri Khasi Jaiñtia, da kaba ka seng kala pynkynmaw ba la jan dap pura saw snem bala dep phah ïa ka Resolution da ka sorkar jylla sha ka sorkar kmie halor ka jingpyntrikam noh ïa ka ILP hapoh ka jylla, hynrei ym ïohi dak satia haduh mynta mynne.
Ha ka juh ka por ka KSU ka kyntu ïa ki nongmihkhmat jong ka Council Council ba kan pyntrei kam hok ïala ka bor kata ban ïada ïa ka khyndew ka shyiap,
U General Secretary ka KSU-EJHDU u samla Kwilnis Suchiang ula ong ba ka seng ka pynrem jur ïa kane ka jingthmu ka sorkar ban wanrah ïa ka lynti Rel lyngba ka East Jaiñtia. Ula ong tang kawei ba ka seng ka donkam ïa ka sorkar kmie bad ka sorkar jylla ba kin pyntreikam ïa ka Inner Line Permit (ILP) hapoh ka jylla kaba la donkam bha mynta.
Hadien ka jingïakren bad u Deputy CEM ula kular ha ka seng ban rah ïa kane ka jingdawa jong ki sha ka Executive Committee da kaba ym ailad satia ban pynpoi ïa ka lynti rel.
Shuh shuh u samla Kwilnis Suchiang ula ong ‘hapoh ka jylla ki jaitbynriew rit pait jong ngi ki don tang hapoh 14 lak ngut hynrei kaei pat ka jingjia lada pdiang ïaka lynti rel khlem da don shwa ïa ka ILP lane ka MRSSA kiba lah ban teh lakam ïa ka jingwan rung kyrthep ki bar jylla’.
