Nongpoh, Naitung 11: Hadien ki jingpynkhreh jong ki bor sorkar jylla ban plie paidbah noh ïaka Patharkhmah Model Degree College kaba dei kawei na ki shlem ai jinghikai ban pynsuk ruh ïaki samla ka thaiñ ba kim donkam shuh ban leit pule sha ki jaka ba kham jngai, khamtam kaba long ka jingkyrkhu kaba khraw ïaki khun samla ka thain Ri-Bhoi Sepngi bad ka dong Ri-Bhoi baroh kawei, hynrei ka seng Hynniewtrep Youth Council, Ri-Bhoi Sepngi haka jingïalam jong u samla RC Thangkhiew uba dei u President haka jingïadonlang jong kiwei kiwei ki dkhot jong ka seng ki la leit ban jurip ïa katei ka College bad lap ïa shibun ki jingbympat biang ha kane ka jaka pule kaba la thmu ban plie paidbah noh da ka sorkar.
Haka jingleit leit jurip jong ka seng la lap ba katei ka College kam pat bit pat biang ban plie paidbah noh ïaka, namar kumba la lap ka surok ban poi sha katei ka jaka ka dang long kaba sniew, bad kiwei kiwei ki jingduna ki kynthup naduh ka umbam umdih, ka bording elektrik bad kiwei kiwei.
Kumta ki dkhot jong ka seng ki la buh ïaka jingkyntu iaka sorkar kaba la ïalam da ka seng NPP ban pynbiang shwa ïaki jingdonkam ha kane ka jaka pule hashwa ban plie paidbah kaba la long kawei na ki kam pynroi kiba ka thaiñ Patharkhmah ka la ap khmih lynti ban pynurlong noh, khnang ba kan long ka jingmyntoi bad ka jingkyrkhu ïaki paidbah ka thaiñ khamtam ki samla pule.
