Nongpoh, Naitung 10: Ka University of Science and Technology, Meghalaya kaba don ha Baridua, Khanapara hadien ba ka la shah jied kum kata ka ‘Key Resource Centre’ na ka Ministry ka tnad Jal Shakti jong ka sorkar kmie ka la shim ïa ka sienjam ban pynlong da ka prokram ba kyrpang ban ai jinghikai halor ka thong jong ka Jal Jeevan Mission sha ki paidbah nongshong shnong ka Shnong Umroi.
Kane ka dei ka prokram ba ar sngi kaa la sdang naduh ka 5 tarik u Naitung bad la pynkut ha ka 6 tarik u Naitung, 2023 ha ka ïing Dorbar Shnong ka Shnong Umroi.
Kane ka prokra ka dei ruh kaba la shim bynta kyrpang da ki dkhot jogn ka Village Water Sanitation Committee bad ki nongmihkhmat na ka tnad PHE na Ri Bhoi District. Kumba 100 ngut ki nongmihkhmat na ka VWSC na ki shnong bapher bapher ha ka thaiñ Umroi ki la wan ban shim bynta ban lum jingtip halor ki jingai jinghikai shaphang ka thong jong ka JJM bad ruh ka jingpyntreikam ïa kane ka skhim JJM hapoh ka jylla Meghalaya.
U Dr. Nibedital Paul, PD ka KRC JJM-USTM u la ai jingkren pdiang sha baroh ki nongshim bynta ha kane ka prokram bad u la ai ruh ka jingpynshai halor ka jingthmu kane ka prokram ai jinghikai kaba dei shaphang ka jingpyntreikam jong ka skhim JJM bad ka thong ba kyrpang jong kane ka skhim kumba la mang da ka sorkar kmie lyngba ka Ministry of Jal Shakti.
Ka Dr. Amelia Nongbet, kaba dei ka senior Expert ka USTM ka la ai jingbatai halor ka jingshah jied katei ka University kum kata ka Key Resource Centres bad mynta kane ka USTM ka don ka jingïatrei lang bad ka tnad PHE na ka bynta ban ai jinghikai halor ka thong ka Jal Jeevan Mission bad kumjuh ruh ban pyntreikam thikna ïa kane ka skhim ban ioh jingmyntoi ki paidbah nongshong shnong ka jylla Meghalaya.
Na ka liang u Rituparno Borkotoki, uba dei u MIS Expert ka KRC USTM, u la ai jingkren ruh sha ki nongshim bynta ban pynshai halor ka thong ka JJM kaba dei kawei na ka skhim ban pynbiang umbam umdih sha ki paidbah nongshong shnong ka jylla.
Ïa kane ka prokram la pynkut ruh da kaba sam ïa ki syrnot (Certificate) sha baroh kiba wan ban shim bynta ha kane ka prokram ba kin long ki nongai jinghikai pat sha ki shnong ki thaw bad kumjuh ruh ba kin don ka jingkitkhlieh kumno ban pyntreikam lane ban sumar ïa ki umbam umdih kiba pynpoi sha man la ki tyngkong ïing jong ki shnong lyngba kane ka skhim Jal Jeevan Mission.
