Kyntu ka EJNC ïa ka DRDA ban pyndam noh ïa ka kyntien ba la ‘tbit lypa’ ha ka thep kam LDA
Khliehriat, Jylliew, 30: Ki dkhot jong ka East Jaiñtia National Council, hapoh ka jingialam u Vice President u bah Ency Shadap, ha ka sngi Thohdieng ki la leit ban buh da ka jingthoh ha u Deputy Commissioner ka East Jaiñtia Hills bad Chairman jong ka District Rural Development Agency bad kyntu ba weng noh ïa kawei ka mat ba la pynpaw ha kaba iadei bad ka post Lower Division Assistant (LDA) kaba ha Lumshnong C & RD Block, East Jaiñtia Hills District kaba la pan da kiba don jingtbit lypa (experienced candidate), halor kane ka seng ka suba jur ba imat ka don kaei re kaei sha lyndet.
Katkum ka shithi sha u Deputy Commissioner ba la soi kyrteng da u Vice President EJNC, u bah Ency Shadap, ka seng ka la pynpaw ba katkum ka jingpynbna ka tnat District Rural Development Agency East JaiñtiaHillsDistrict, (20th June 2023 Ref No. EJHD/DRDA/702/2022/5) ka la khot application halor ka kam Junior Engineer bad Lower Division Assistant (LDA) ha Lumshnong C & RD Block, East Jaiñtia Hills District kiba dei ha ka contractual basis, na ka liang ka EJNC ka kren hangne tang ïa ka post Lower Division Assistant (LDA), namar ba ka tnat DRDA ka pan ïa kiba don jingtbit ne experience lypa ar snem ha ka kam, halor kane ka seng ka pynpaw ba “Kiba bun kiba la nag la stad kiba hapoh ka district bad shabar ka district ki dei kiba ym pat don jingtbit eiei na ka daw ka jingkyrduh kam la ka dei ka kam sorkar ne kano kano ka kam private, te kane kan pynlong ïa kiba bun ki nongthep kam ba kin nym don kano kano ka jingtbit ha ka kam kaba long katkum ka jingpan na katei ka tnat, kane kan ktah ïa ki samla wad kam kiba la biang ka kyrdan pule kiba don ka hok ban thep ïa katei ka kam bad kiba don hok ban ioh ïa ka kam sorkar”
Na ka liang ka seng ka ong ba lada ïa katei ka mat ba pan ïa kiba don jingtbit ne don experience ïa ka post LDA kim pyndam, ka seng kan nym shong kli kti hynrei kan ïaid sha khmat, namar kane ka ktah ïa ki samla wad kam kiba hapoh ka district ki bym pat don ne ki bym pat shym ioh jingtbit (experienced) bad kiba la biang ka kyrdan pule ban thep ïa katei ka kam.
Halor kane, ka seng kan sa leit ban iakynduh mar khmat bad u Deputy Commissioner ka East Jaiñtia Hills District bad ïakren halor kane.