Long ki nongïalam kiba don ka jingïatylli, ka jingïaieit, bad ka jingïashaniah: Lumlang Kharsyiemlieh

Mawkyrwat, Jylliew 04: Ka Hynñiewtrep Youth’s Council (HYC) jong ka Mawkyrwat Circle ha ka sngi saitjaiñ jong ka taïew ka la ïoh ban pynthymmai ïa ki nongkitkam jong ka ha kaba u bah Lumlang Kharsyiemlieh, President ka HYC West Khasi Hills bad Socio & Cultural Secretary jong ka Central Body u la long kum u kongsan ha ka jingïalang ba la pynlong ha Community Hall, Mawkyrwat, South West Khasi Hills District.
Haba kren kum u kongsan ha ka jingïalang, u bah Lumlang Kharsyiemlieh, President ka HYC West Khasi Hills u la ong ba ka jingkhlaiñ jong ka seng ha ki bynta baroh naduh ki Unit haduh ka Central Body ka shong eh ha ka jinglah jong ki dkhot ban ai ka jingïatreilang ha ki por baroh. “Haba im ki samla ban ai ka jingshakri ka ri bad ka jaidbynriew ruh ka im”, ong u bah Lumlang. Kumta, u kyntu ïa ki nongkitkam jong ka HYC ba haba ki trei kum ki nongïalam ha ka Ri bad ka Jaidbynriew ki dei ban trei da ka mynsiem jong ka jingïasngewthuh jingmut kata naduh ki circle, ki unit, ka distrik haduh ka central body khnang ba kumno kin lah ban pynïaid ïa ki jingtreikam ha ki por baroh bad kam myntoi ba ka seng kan don shibun ki unit bad ki circle lada kim lah ban ai ka jingtreikam ha ka lynti kaba dei.
Namarkata, ha ka jingkren jong u u la buh ruh ïa ki lai tylli ki mat ba kongsan ba kum ki dkhot jong ka seng ki dei ban don kata ka jingïatylli, ka jingïaieit, bad ka jingïashaniah iwei ïa iwei pat ha ki para dkhot bad lada kum ki dkhot jong ka seng ki don ïa kine ki lai tylli ki mat kan nym don kano kano ka lynti kaba wit ha ka jingïaid lynti ka jong ki ban shakri ïa ka ri bad ka jaidbynriew.
Haba kren halor ka Reservation Policy, u bah Lumlang u la ong ba um kyrshan ïa ka party VPP hynrei u kyrshan ïa ka jingdawa ba kum ka ri bad ka jaidbynriew ka donkam.
Ïa ki nongkitkam ba thymmai jong ka Hynñiewtrep Youth’s Council (HYC) jong ka Mawkyrwat Circle la ïoh ban pyntiansmai da u President ka HYC West Khasi Hills bad uba bat ïa ka kam Socio & Cultural Secretary jong ka Central Body, u bah Lumlang Kharsyiemlieh ha kaba ki nongkitkam ki long President u bah Wallambor Nongsiej, Vice President u Welman K. Lynïong bad u Bonijune Shangpliang, General Secretary u Kyrpang Lyngdoh, Assistant Secretary u Thomas Thyrniang, Finance Secretary u Banteilang Wanniang, Organising Secretary u Rishotroi Kharjahrin, Publicity Secretary u Kendar Iawphniaw, Assistant Publicity Secretary u Viany Lyngdoh.
Nangta, Education Secretary u Ricky Hendry Kharjahrin, Assistant Education Secretary u Luckystar Marweiñ, Environment Secretary u Polmiky Marweiñ, Assistant Environment Secretary u Rikupar Syiemlieh, Sports Secretary u Ban Kharjahrinm, Assistant Sports Secretary u Teiborlang Ryntathiang, Office Secretary u Banjop Thongni, ha ryngkat bad ki 11 ngut ki dkhot bad u bah Robertjune Kharjahrin lem bad u Arbok Kharjahrin ki dei ki Advisers.
Ha kane ka sngi la ïoh ruh ka jingkren ai mynsiem na ki katto katne ki riew rangbah kata na u bah Wallam Syiemiong, Chairman ka Synjuk ki Seng Samla Shnong, South West Khasi Hills District, u bah S. Kharjahrin, Myntri Shnong Sakwang bad na u bah Mandelius Nongbri, Vice President HYC South West Khasi Hills District.
Ïa ka jingïalang la pynïaid da u bah Arbok Kharjahrin, President jong ka HYC South West Khasi Hills District bad kren khublei na u Wallambor Nongsiej, President ba thymmmai jong ka HYC Mawkyrwat Circle.