Jowai, Jymmang 31: Ki katto katne ngut ki riew rangbah na ka East Jaiñtia Hills kila bteng ïa ka jingleit pynsngewthuh paidbah sa sha ki thaiñ nongkyndong halor ka Reservation Policy, ha kaba mynta ka sngi ïa ka jingpynshai halor kane ka Policy bhah kam bhah jam bad ka jingkyrshan na ka bynta ban pynthymmai (Review) ïa ka RP, la pynlong ha ïew ka shnong Cheruphi jong ka East Jaiñtia Hills.
Ïa ka jingïalang kaba la pynïaid da u Waheh Shnong kane ka shong u ma Phrom Rymbai ha ka jingïadon lang kiwei de ki rangbah na ki para jan shnong kane ka thaiñ ryngkat ki paidbah bad ki placard ban pynpaw ïa ka jingkyrshan ka jong ki ïa kane ka jingdawa, kaba la lam khmat da u nongïalam ka VPP u bah Arden Basaiawmoit.
Ha kane jingïalang la ïoh ki jingkren na u ma Wanshwa Nongtdu uwei naki samla rangbah na ka shnong Mynkre East Jaiñtia Hills District, uba la ong ba kane ka Reservation Policy ka mynta ka long kaba donkam shisha ban pynbeit thymmai noh ïaka na ka bynta ka bha ka miat jong ka jaitbynriew Khasi Pnar hapoh ka jylla Megahlaya, ula ong ruh kumba long mynta kane ka Policy ha ka rukom bhah ka long 40% ïa ki paid Garo, 40% ïa ki paid Khasi Pnar, other ST 5% bad ki General Category 15%, hynrei ula ong mynta kam ïahap shuh namar mynta ka jingbun jong ki briew ka la nangbun nangbun.
Ula ong ruh ngi khlem wan ha kane ka jingïalang na ka bynta ban ai jingkyrshan ïa ka VPP kaba la lam khmat ïa kane ka jingdawa, hynrei na ka bynta ka jingdonkam jong ka jait bynriew hynñiewtrep, hynrei ula ong ba ngi ai ïa ka jingkyrshan ïa u bah Arden u nongïalam ka VPP uba la don shisha kata ka mynsiem bad jingmut kaba skhem ban ïaleh na ka bynta ki jingdonkam jong ka jait bynriew Khasi Pnar uba la ïaleh ym na ka bynta ïalade ne ïa ka Party jong u hynrei na ka bynta ka jait bynriew.
Na ka liang jong u, ula kyntu ruh ïa ki nongmihkhmat kane ka thaiñ naduh ki MLA, MDC bad kiwei de ba kin mih shakhmat bna ka bynta ka jait bynriew.
Na ka liang u ma Firstbornson Nongtdu uba na Khliehriat, ula ong ba wat lada ngim lah ban poi sha Shillong ha kaban ai mynsiem ïa u bah Ardent, hynrei ngi dei ban buh ka jingduwai na ka bynta jong u, uba la shah ïap shah thnga na ka bynta ki khun jong ka ri bad ka jait bynriew.
Shuh shuh na ka liang jong u ma Firstbornson, ula pynrem ïa ki nongmihkhmat kiba la jop na kane ka thaiñ ba kim leh eiei kat kum ka jingkular jong ki ha ka por shwa ka Election, kiba la sngap jar khlem da ïohi ba ki kren halor kane ka issue jong ka jait bynriew Khasi Pnar.
Shuh shuh la ong ruh ba kum kine ki jingïalang pynshai paidbah halor ka Reservation Policy kin sa long shuh sha ki shnong bapher bapher ka thaiñ East Jaiñtia.
