Mawkyrwat, Jymmang 30: Ka United Democratic Party (UDP) jong ka Mawkyrwat Circle ha ka jingïalang ba kyrkieh mynta ka sngi ha ophis treikam jong ka party kaba don ha Mawkyrwat, South West Khasi Hills District ki la ïakren halor kumno ban don ïa ka jingïasngewthuh jingmut lang na ka bynta ban wanrah ban pynthymmai noh ïa ka Reservation Policy hapoh ka jylla Meghalaya baroh kawei.
Hadien ka jingïalang, u bah Jes Nongsiej, Vice President ka UDP Mawkyrwat Circle u la pynshai ha ki lad pathai khubor ba ha kane ka jingïalang ki nongïalam hapoh ka circle la ïa rai ban ai jingkyrshan ba pura ban pynkylla ne ban pynthymmai ïa ka Reservation Policy khnang ba kan long janai ha ki bynta baroh.
U la ong shuh shuh ba kum ka party ïa kane ka mat ki la buh hakhmat ha ka Manifesto ne ka kot kyrpad jong ka UDP ban khot ïa ki Political Party ban lum ban lang ban ïa kren halor kane ka phang ban pynthymmai ryngkat ban don ka jingkhot ïa kren halor ka Reservation Policy bad ngeit skhem ha kine ki khyndiat sngi ban wan na ka liang ka sorkar kan sa shimkhia ïa kane ka bynta.
U bah Jes u la kdew ruh ba kumba ha ki por election na ka liang ka UDP ka ju kren ruh ha ki paidbah halor kane ka bynta kaba donkam tam na ka bynta ki khun ki kti ki jong ngi bad kumba ki la buh hakhmat ïa kane ka Reservation Policy mynta ka kynti ruh kum ka UDP Mawkyrwat Circle ryngkat bad u bah Renikton Lyngdoh Tongkhar, MLA ka thaiñ ki la ïa rai rangbah ba katba jia ki la mynjur lang ban kyrshan ba ka sorkar ka dei ban pynthymmai noh ïa kane ka mat ïa kaba ym tang ka UDP ka dawa hynrei wat ki paidbah ruh ki don ïa ka juh ka thong ban dawa ba dei ban pynthymmai noh ïa ka rukom thung-kam thung-jam hapoh jong ka jylla namar ba kane ka dei hi ka jingmyntoi ym tang ha ka mynta hynrei khamtam ïa ka lashai ka ban sa wan, ong u Vice President jong ka UDP Mawkyrwat Circle.
Ha kane sngi la ïadonlang ruh u bah Renikton Lyngdoh Tongkhar, MLA ka Mawkyrwat, ki nongkitkam jong ka UDP Mawkyrwat bad ki paidbah.
