Wan shakmat ban phah sumar ha ka por ar met, kyntu ka DC ïa ki longkmie

Ranikor, Ïaïong 22: Kum shibynta jong ka jingrakhe ïa ka jingdap 75 snem jong ka jingïoh laitluid ka ri India, ka ophis jong u Sub Divisional & Health Officer, I/c BPMU, Ranikor mynta ka sngi u la pynlong ïa ka Health Mela ba shisngi ha United Khasi & Garo Upper Primary School Ranikor da ka jingthmu ban ai jingshakri kaba biang bad ba paka khlem da donkam siew dor ei ei ïa ki paid nongshong shnong ha kaba ïa dei bad kiba bun ki skhim sorkar kiba ïa dei bad ka koit ka khiah bad kumjuh ruh ha ka ban pynrung kyrteng ïa ki nongïashimbynta.
Ha kane ka ‘Health Mela’ la buh ruh ïa kiba ki stalls na ka bynta ban pynsngewthuh bad ai jingshikai ïa ki paidbah halor kiba bun ki skhim sorkar kiba ïa dei bad ka thong jong ka koit ka khiah. Ha kajuh ka por la pynkhreh ïa ki Health ID hapoh ka ABDM, ïa ki nongïashimbynta bad la sam ïa ki Ayushman Bharat E-Cards ha kajuh ka sngi.
Haba kren kum ka kongsan, ka kong C. Kharkongngor, IAS, Deputy Commissioner jong ka South West Khasi Hills District ka la pynpaw ïa ka jingsngewkmen ban ïohi ba kiba bun ki paidbah ki la ïa tuid sha kane ka mela. Ka la ong ruh ba kane ka mela ka long kum ka rynsan ha kaba ki briew kin ïoh shibun ki jingtip bad jingshakri ki ban ai jingmyntoi ïa ki ha ka liang ka koit ka khiah na ka bynta ban ïada ïa lade bad ïa ki ïing ki sem na ki jingpang kiba lah ban pur bad ki bym pur.
Ha kajuh ka por ka la ai ruh ka jingïaroh ïa ka jingtrei shitom jong ki nongtrei ka koit ka khiah ha ki snem ba la leit bad ka nang ai mynsiem shuh shuh ba kin nang ïaid shakhmat ha ka jingshakri jong ki ïa u paidbah. Ka la pynpaw ruh ïa ka jingbynñiaw halor ka jingbun jong kiba pang duna snam na ka daw ka jingbym biang ki jingbam ba tei met bad ha kajuh ka por ka la wer bad khot ïa ki longkmie ban wan shakmat ban phah sumar ha ki doktor ha ka por ba ki ar met bad ban leit kha ïa ki khun jong ki ha ki jaka sumar ban lait na ki jingjia ba sngewsih bad ban kiar na kaba sngap ïa ki khubor ka khlieng ka tyngab kiba pynsuh jer bad pyntieng pynsmiej bad kiba long ka daw jong ka jinghiar ha ka koit ka khiah ha ka imlang sahlang bad ka roi ka par ha kane ka thaiñ.
U bah A.L. Bareh, Block Development Officer, Ranikor C&RD Block, u la ong ba ka jingkoit jingkhiah ka dei ka spah bah bad kaba donkam tam ha ka jingim jong ki briew. U la ïathuh ba haduh kumba 249 ngut ki dkhot na ki SHGs la dep ai jinghikai da ka jingiatreilang ka NRLM bad ka ICDS, Ranikor na ka bynta ban kyntiew ïa ka koit ka khiah ha kane ka thaiñ. Namarkata, ka donkam ïa ka jingkitkhlieh bad jingshimkhia jong ki paidbah na ka bynta ban shim ïa kiba kum kine ki lad ki kabu na ka bynta ban kyntiew ïa ka ïoh ka kot ha ka imlang sahlang lyngba ka koit ka khiah.
U Dr. W.L. Narry, District Immunisation Officer & District Surveillance Officer, MCH, South West Khasi Hills District haba pynpaw ïa ka jingbynniaw halor ka jingshimsting jong ki kmie ki kpa ha kaba ïa dei bad ka jingai tika ban ïada ïa ki jingpang kiba bun jaid u la khot bad wer ïa ki ban weng noh ïa ka jingtieng na ka jingmut jingpyrkhat jong ki bad ban wan shakhmat khnang ba ki khun ki kti kin ïoh ïa met kaba koit ba khiah krat.
Ha kajuh ka por u la khot ïa ki khynnah kynthei bad shynrang kiba la kynjoh ka rta na ka bynta ban shim ïa u Covid Vaccine khnang ban lah ban pynduh jaid ïa kane ka jingpang kaba pur sted bad kaba shyrkhei. Namarkata, ka jingïatreilang bad u paidbah na ka bynta ban wanrah ïa ka bha ka miat bad ka roi ka par ha ki shnong ki thaw lyngba ka koit ka khiah ka long kaba donkam haduh katta katta.
U Dr. H. Sangma Medical Officer Ranikor u la ong ba ka jingthmu bad ka thong jong kane ka mela ka long ban pynsngewthuh ïa ki paidbah halor kiba bun ki skhim kiba ka sorkar ka la wanrah na ka bynta u paidbah da ka jingthmu ban ai ha ki ïa ka jingsumar kaba bha bad kaba paka khlem da donkam siew dor ei ei.Namarkata, u la kyntu ïa ki paidbah ban shim kabu ïa kiba kum kine ki lad khlem da pynsep ei namar dei tang ka jingkoit jingkhiah kaba lah ban wanrah ïa ka jinglong jingman kaba bit ba biang bad ka ban kyntiew ïa ka roi ka par.
Ha kane ka prokram la don ki ‘riew rangbah, ki kynthei ki khynnah bad khyllung kumjuh.
U bah S. Thongni, Rangbah Shnong jong ka Ranikor u la ai ïa ki kyntien pdiang sngewbha, katba u Dr. T. Sangma, Medical Officer jong ka Ranikor Community Health Centre u la ai ïa ki kyntien khublei.