Delhi, Ïaïong 09: U Myntri Rangbahduh ka ri u Narendra Modi kum shibynta ban rakhe kmen lang bad ki Khristan ïa ka jingkynmaw burom ïa ka sngi mihpat jong u Trai Jisu Khrist ha ka sngi u Blei u la leit ban shim bynta ha ka jintgrakhe Paskha ka Balang Catholic da ka jingleit jngoh ïa ka Ïingmanebah jong ka Dohnud Bakhuidtam u Jisu ha New Delhi.
Kane ka jingleit jngoh u Modi ïa ka Ïingmane bad ban shim bynta ha ka jingrakhe Paskha ka Balang Catholic ka la pynbakla lut war ïa ka jingkynnoh kiba bun ba ka BJP bad u Modi ki dei kiba pyrshah Khristan.
Ha kane ka jingleit jngoh la ïohi ba u Modi u la ai khublei ïa ki riewngeit bad thang mobati ha khmat ka statue jong u Jisu ba la mihpat bad kumjuh ruh la ïohi ba u Modi u shong puson ha ryngkat ka jingduwai ha ryngkat ka jingsynsran lang u Archbishop jong ka Delhi Archdiocese u Archbishop Anil Joseph Thomas Couto ha ryngkat ka jingïadonlang kiwei pat ki Bishop bad ki paid riewngeit.
Hadien ba u la dep ban leit jngoh ïa kane ka ïingmane u Modi u la ong lyngba ka Twiter “Mynta ka sngi ha ka sngi kyrpang jong ka Paskha (Easter) nga donbok ban ïoh leit jngoh ïa ka Sacred Heart Cathedral ha Delhi. Nga la ïoh ruh ka kabu ban ïa kynduh ïa ki nongïalam jong ka Balang Khristan (Catholic).”
Kumjuh ruh ha ka por mynstep la ïohi ba u Modi u la ai khublei Easter ïa ki riewngeit Khristan baroh lyngba ka Twiter jong u ha kaba u la ong lyngba ka Twiter jong u, “Ka Easter bakmen ïa baroh! Ai ba kane ka sngi kyrpang ba ngi rakhe ïa ka Easter kan kham pynjylliew ïa ka mynsiem jong ka jingsuk jingkmen ha ka imlang sahlang. To ai ruh ba kan ai mynsiem ïa ki briew ban shakri ïa ka imlang sahlang bad ban ïarap aibor ïa kiba shem jynjar shem lanot. Ngin kynmaw ruh ïa jingpyrkhat blei jong u Trai Jisu Khrist ha kane ka sngi Easter.”
