Nongpoh, Ïaiong 03: Namar ka jingbitar halor ka jingkynnoh kren tohmet jong kawei ka doctor pyrshah ïa uwei u nongpang bala rangbah briew ha Civil Hospital Nongpoh, ka seng HYC Ri-Bhoi District mynta ka sngi haka jingïalam u Samla Tony Shylla General Secretary bad ki dkhot kila leit ban ïakynduh syndon ïa ki bor pynïaid jong katei ka jaka sumar ban pynsngew bad ujor halor katei ka jingkren khlemakor jong katei ka doctor haka miet jong ka 30 tarik Lber hadien ba u tei u nongpang u la leit ban phah sumar ha katei ka miet namar ka jingshitom jur.
Naka liang ki nongïalam ka seng kila leit ruh ban ïakynduh ïaka Dr. N sangma Medical Superintendent ka Civil Hospital Nongpoh bad kumjuh ruh ïa u Dr. P Kharnarry DMHO ka Ri-Bhoi District ban wad bñiah halor katei ka jingjia kaba la jia haka miet jong ka 30 tarik kaba utei u nongpang ula shah kren da ki ktien tohmet kiba ym lah ban pdiang wat hapdeng ka jingshitom jur ban ioh ka jingsumar na katei ka Hospital.
Naka liang ka seng kala ioh ruh ban ïakren bad katei ka Doctor ha katei ka sngi ha kaba kala pan map ruh hakhmat jong utei u nongpang ba leit ryngkat bad ka seng, da kaba ai daw ruh ba dei namar ka jingkhia jong ka kam ba kala kum kren da ki ktien kiba kham khor ha katei ka miet namar ka don duty tang marwei ha katei ka jaka sumar.
Haba kren sha ki lad pathai khubor hadien ka jingleit kynduh ïa ki bor pynïaid jong katei ka Hospital, u Samla Tony Shylla General Secretary ka seng u la pynpaw ka ba kum ka seng ka dap da ka jingsngewkhia halor katei ka jingjia, bad kum kine ki jingjia bad ki jingkren tohmet da ki nongtrei jong ka hospital kam dei shuh ka sien ba nyngkong, hynrei bun naki paidbah ki mad ïa kum katei ka jingjia bad kyntaid wat ban leit phah sumar lait noh da ka jingbym banse.
U la ong ruh ba naka liang ki bor pynïaid kila pynpaw ba lehse ka dei ka jingkhia jong ka kam ba katei ka doctor kala kum kren da ki ktien kiba khor bad tohmet pyrshah ïa u nongpang ha katei ka miet watla katta ruh kum ki bor pynïaid kin leh ïa kaba donkam ha kaba ïadei bad katei ka jingjia.
Naka liang ka seng ka kyntu ruh ïa baroh ki nongtrei jong katei ka hospital ba kidei ban nang ban kren ban burom ïaki nongpang khamtam kiba don hapdeng ka jingshah sumar namar lyngba ka jingkhor ktien bad ka jingkren tohmet jong ki kan nang pynjur ïaka jingpang jong ki briew kiba phah leit sumar ha katei ka jaka, namar bun naki paidbah ki ju ud bad ujor halor ka jingleh baheh jong ki nongtrei katei ka hospital.
Shuh shuh naka liang ka seng ka pynpaw ruh ka jingsngew lyngngoh ba kumno kat ka civil Hospital ka phah doctor tang kawei ban leh ïaka duty 24 kynta bad halor katei ka bynta naka liang ka seng kan sa phah ruh da ka jingthoh sha ka sorkar ban pynbiang shuh shuh ïaki doctor ban sumar ha katei ka jaka sumar.
