Ka UDP ka ladep ong ïa ka Sorkar ban peit biang ïa ka jingpynbeit pud: Dr. Jemino

Shillong, Nohprah 08: U General Secretary ka UDP, u Dr. Jemino Mawthoh, u la ong ba ka Seng ka la dep ong ïa ka sorkar ban peit biang ïa ka MoU ba ïasoi bad ka Assam halor ka jingïapynbeit pud hadien ba la mih ka jingbymhun na ki nongshongshnong na khappud bad ka jingbymhun ruh na kiba bun ki liang.
Ïa kane u la pynpaw haba la kylli kaei ka jingsngew jong ka Party halor ka jingpynsangeh shuwa ka High Court of Meghalaya ïa ka jingïasoi MoU hapdeng ka Meghalaya bad ka Assam ban pynbeit ka Meghalaya bad ka Assam ha ki 6 tylli ki jaka kiba don ha khappud kine ki artylli ki jylla, da kaba ka la khang ban leit sieh mawpud katba ym pat dep ka mukotduma.
“Ngim pyrshah ïa ka jingïapynbeit pud, hynrei haba ngi ïohi ïa ka jingbymhun na kiba bun ki liang, ngi la ong ïa ka sorkar ban pynsangeh shuwa, hynrei ka sorkar kam shym la sangeh”, la ong u Dr. Mawthoh bad bynrap ba kan shong mynta ha ka ïingbishar kumno ban shim ïa kane ka kam, haba ka la pynsangeh shuwa.
Pdiang sngewbha ka HITO: U President ka HITO, u Bah Donbok Dkhar, u la ong ba ka Seng ka pdiang sngewbha ïa kane ka rai jong ka High Court, namar ba ka Seng ha ka jingïakynduh bad u Myntri Rangbah ha ka 5 tarik mynta u bnai, ka la kyntu ïa u Conrad ban pynsangeh shuwa ïa ka jingïakren pynbeit pud bad ka Assam, ka daw ka long ba ka jingïapynbeit pud ha ka bynta kaba nyngkong kam long kaba pynhun bad kadei kaba pynkheiñ ruh ïa ka Article ba 263 jong ka Riti Synshar jong ka ri India, namar ka ong ba ïa ka jingpynbeit pud dei ban thaw ïa ka Inter State Council kaban shim ïa ka rai ba khatduh ha ka jingïapynbeit pud.
Nangta ka la ong ruh ba ka Article 299, ka ong ba ïa ka jingpynbna halor ka jingïapynbeit pud dei ban soi da ki Lat jong ki artylli ki jylla.
“Ngi pdiang sngewbha ïa kane ka rai jong ka ïingboishar badonburom jong ka jylla Meghalaya”, la ong u Bah Donbok.