Syllad ka BJP ha Gujrat, ka Congress ha Himachal, ka AAP ha Delhi

0

New Delhi, Nohprah 08: Ka Seng BJP ka la jop kput ha Gujrat da kaba jop 156 ngut ki MLA ha ka ïingdorbar kaba don 182 ngut ki MLA. Kane kadei ka jingjop kaba khrawtam jong ka Seng ha ka elekshon MLA. Ka sien kaba khatduh ba ka Party kan jop bun eh kadei ha u snem 1985 ha ka por ba long Myntri Rangbah u Madhav Singh Solanki jong ka Congress.
Kadei ruh ka sien kaba hynñiew sien kynthih ba ka BJP kan jop ïa ka elekshon MLA naduh u snem 2002.
Ka Congress ka la jop tang 17 ngut bad hiar haduh 61 ngut na ka elekshon kaba la long ha u snem 2017, katba ka BJP pat ka kiew haduh 57 ngut. Ka Aam Admi Party (AAP) ka la jop tang 5 Seat, wat lada ka la kam ba kan jop bun. Hynrei da kane ka jingjop ha Gujrat ka AAP mynta kala kylla long ka National Party bad kadei ka National Party kaba thymmai eh ha ri India.
Hynrei ka Congress ka la ïoh knieh ïa ka bor synshar ha kawei na ki jylla riewlum jong ka ri India, ka Himachal Pradesh, ha kaba ka la jop 40 ngut ki MLA ha ka ïingdorbar kaba don 68 ngut ki MLA. Ka BJP kaba la synshar kane ka jylla ha kine ki san snem baladep, kala jop tang 25 Seat.
Ka BJP ka la ai burom ïa u Myntri Rangbah Duh, u Narendra Modi ha ka jingjop ha Gujrat. U Modi lah ban kdew hangne udei u Myntri Rangbah barim ka Gujrat tad haduh ba un da leit sha Delhi ban shimti kum u Myntri Rangbah Duh ha u snem 2014.
Napdeng ki 182 ngut ki MLA kiba la jop mynta ka sngi, ka kynthup ruh ïa ka lok jong u nongïalehkai Cricket ka India, u Ravindra Jadeja bad kane kadei ka Rivaba Jadeja.
Ka Aam Admi Party (AAP) kaba la rem ha Gujrat, hynrei ka ïoh knieh na ka BJP ïa ka jingsynshar ha ka Delhi Municipal Corporation, kaba ka Delhi ka la synshar mynta la 15 snem.

Leave A Reply

Your email address will not be published.