Nongpoh, Naiwieng 19: Hapdeng shibun ki jingeh bad ki jingtynjuh ba ka Longkmie ka mad ban bsa ïa ki khun ki kti bad ban sah tang ha ka ïing ka sem kaba jot ba rathai na ba ban ka jingduk bad mynta ka sngi pat ki ummat jong ka jingkmen ki shlei bad ki shlei ha kane ka Longkmie, kaba dei hadien ba ka Khasi Students Union, North Khasi Hills District Unit ka la aiti ïa ka ing ba la pynshna kyrpang kum shi bynta ka jingrakhe ïa ka jubili rupa kaba dei ka jingïaid lynti ba 25 snem ka KSU, North Khasi Hills District Unit naduh ba la wan suid wan shor ha u snem 1997 ha Ri Bhoi District ban shakri ïa la ki paradoh ki para snam.
Kane ka ïing kaba la bit la biang bad kaba la don la ka rong ka rup ban da ïa ka burom jong ka ïing ka sem, ka dei ïing kaba la pynshna kyrpang da ka KSU North Khasi Hills District Unit ryngkat ka jingïatrei lang ka KSU, Pahamsyiem Unit sha kawei ka Longïing jong ka Kong Silima Lymphuid kaba don 4 ngut ki khun 2 kynthei bad 2 shynrang bad ba u kpa ka ïing u la khlad noh ha ka dong Chinchana jong ka Shnong Pahamsyiem ha Ri Bhoi District.
Haiden ba la dep pura ban shna ïa katei ka ïing bad la ai rong ai rup, ka KSU North Khasi Hills District Unit mynta ka sngi ka la pynkhamti noh ïa kane ka ïing sha ka Kong Silima Lymphuid ba la aiti bad plie paidbah da u President ba rangbah ka KSU, Sengkmie, u Samla Lambok Starwell Marngar kum u kongsan bad la sakhi lang ruh da ka jingdon lang u Vice President ka sengkmie, u Samla, Biangbor L. Palïar, u President ka KSU, North Khasi Hills District Unit, u Samla Ferdinald Kharkamni, u Vice President, Lambok Rymbai bad kynthup naduh ki nongïalam ka Nongpoh Circle bad ki Unit kiba la ïa don lang ha kane ka sngi.
La ai mynsiem ruh ha kane ka sngi da ka jingdon lang u Assistant Rangbah Shnong ka Shnong Pahamsyiem, u Bah Wanphrang Sumer, ki seng longkmie bad kynthup ki riew rangbah na ka shnong bad ki khun ki kti bad kiba haing hasem jong ka Kong Silima Lymphuid kaba la iohpdiang sngewbha ïa kane ka ïing ba la pynshna da ka KSU North Khasi Hills District Unit ha Ri Bhoi District.
Haba kren ha kane ka sngi, u President ba rangbah ka KSU, u Samla Lambok Starwell Marngar, u la ai ka jingïaroh kaba khraw ïa ka KSU North Khasi Hills District Unit bad baroh ki dkhot kiba la shim ïa ka jingkitkhlieh ban tei kyrpang ïa kane ka ïing na ka bynta ka longïong baduk ha kane ka shnong bad kane ka long ka nuksa kaba bha ba wat lada ngim don spah don phew bad phewse ka jingkylluid mynsiem bad ka jingïasnoh kti lang ngi lah ban ïarap na ka bynta ki paradoh ki parasnam kiba shem jynjar bad shem lanot ha ka ri baieit jongngi.
Kum ki nongïalam bad ki paradoh ki parasnam ngi dei ban long kita kiba kylluid mynsiem bad kiba don ka jingkitkhlieh ïa la ki paradoh ki parasnam bad kaei kaba sngewsih ka longba kiwei ki bar jylla ki ioh ïa ki ing ki sem kiba paka bad bun na ki paradoh para snam pat wat la ka jaka ka puta kim don ïing don sem, kaba dei na ka daw ba ngim kylluid mynsiem.
U la kren ruh halor shibun ki phang kiba ktah ïa ka jaid bynriew jongngi, bad kum ki paradoh ki parasnam ngi dei ban don kawei ka mynsiem na ka bynta ban ïada kyrpang ïa la ka jaid bynriew kampher ha kano kano ka kam kaba ngi trei bad ka mynsiem jong ka jingieit ïa la ki paradoh ki parasnam ka dei ban don hapoh ka mynsiem jongngi.
Shuh shuh, u la kyntu ruh ïa ki nongïalam bad wat ïa ki dkhot ka jaid bynriew ba ngi dei ban don ka mynsiem jong ka jingïakit ïabah ïa la ka jaid bynriew, namar lada ngim don kata ka jingïatrei lang ka long kaba eh ban ïada kyprang ïa la jinglong trai ne ka riti ka dustur ka jaid byrniew bad lada ngim don hi kata ka riti ka dustur ka buh jingma ïa ka jaid bynriew baieiid jongngi, u la bynrap.
La ai jingkren ruh da u President ka District, u Samla Fedinald Kharkamni, ha kaba u la ïathuh ba kane ka jingshna ïa kane ka ïing sha kane ka longïing baduk, ka dei shi bynta ka jingrakhe ka KSU North Khasi Hills District Unit ïa ka jingdap 25 snem ba ka la ïaid lynti ban shakri ha Ri Bhoi bad kum ka seng wat hadpdeng shibun ki jingeh kan ïai trei ban ïada kyrpang na ka bynta ki paradoh ki para snam hapoh ka District bad ha ka jylla hi baroh kawei.
