Shillong, Naiwieng 11 : Ka Manipur ka la khur ïa baroh ar ki takma Ksiar ha ki ar tylli ki kyrdan ïalehkai hynne ka sngi Thohdieng kaba dei ka sngi sdang jong ka jingïalehkai ñiah cycle jong ka 2nd North East Olympic Games 2022 kaba la pynlong ha khlaw Malki, katba ka Meghalaya ka la khur takma Rupa.
La pynïalehkai hynne ka sngi da ka elite bad ka junior cross country, baroh kidei ha ka liang ki shynrang.
La sdang ka jingïalehkai na khlaw Malki sha u Lum Shillong bad wanphai biang sha kajuh ka jaka. Ha katei ka jingïakop ñiah cycle ka la don ka jingmynsaw ba malu mala hynrei ki nongïalehkai ki khlem kynran dien bad beh beit sha ka thong, ha kaba u Mesak Vanlalvena jong ka Mizoram u la ïoh ka jingai khublei na ki paidbah hadien ba u la pyndep ïa ka thong bad khur ïa ka takma rnong watla hapdeng ka jingjngem ka durkhmat.
Ïa ka takma Ksiar la ïoh da u Khundrakpam Ronel Singh jong ka Manipur, katba u Kevin John Khyllait u rangïalehkai pynher cycle pawnam ka jylla Meghalaya u wan ha ka kyrdan ba ar.
Ha ka liang ki junior, u AZ Thotmachan jong ka Manipur u la jop ïa ka takma Ksiar, katba u Pynshailang Khyllait jong ka Meghalaya u wan ba ar bad jop ïa ka takma Rupa bad u Vanlalruata jong ka Mizoram ïa ka takma Rnong ha ka kyrdan ba lai.
Ïa ki takma jong katei ka jingïalehkai yn sam lashai ka sngi Saitjaiñ, ïa kaba yn sa pynbud pat da ka jingïalehkai women’s cross country bad ka downhill jong baroh ar shynrang bad kynthei
