Shillong, Naiwieng 11 : Ka jingïalehkai ïakura Boxing jong ka 2nd North East Olympic Games 2022 ka la sdang hynne ka sngi Thohdieng ha ka rynsan ïakura ha Mawlai Mawroh, katba ka jingïalehkai kynhun jong ka Badminton ka la jam sha ka phainal ha ka jingïalehkai ha Indoor Hall, JN Sports Complex, Polo.
Ha ka Boxing la ïoh ban pynïalehkai haduh 29 Bout ba kynthup 18 jong ki shynrang bad 11 jong ki kynthei. Ha ka jingïalehkai kynhun jong ka Badminton, ka Assam kan ïakhun phainal pyrshah ïa ka Arunachal Pradesh mynta ka sngi Saitjaiñ ha ka por 4 baje janmiet. Katba ka kynhun jong ka Meghalaya ka la rem noh ha ka Assam ha ka jingïalehkai semifinal bad pyndep da kaba khur takma Rnong.
Ha kane ka sngi yn sdang ruh ka jingïalehkai ba para marwei (individual) jong ka Badminton.
