Nongpoh, Naiwieng 08: U MLA bad MDC jong ka Nongpoh Constituency u Bah Mayral Born Syiem bad Bah Balajied Ranee MDC haka sngi nyngkong jong ka taiew kila leit ban plie paidbah ïa 6 tylli ki kam pynroi haki 3 tylli ki shnong ha Nongpoh Constituency ba kynthup ïaka shnong Umklai, Nongtyrlaw bad ka shnong Pahamshken.
Kitei ki 6 tylli ki kam pynroi ki kynthup 4 tylli naka skhim SRWP bala plie da u Bah Mayral Born Syiem ba kynthup ïaka se map kali haka shnong Umklai bala tei haka jinglut ba 1 lakh jong u snem 2019-20, ka Graveyard shed jong ka Balang Katholik kaba la tei haka jinglut ba 1 lakh jong u snem 2019-20, ka kynroh iing Dorbar jong ka Shnong Pahamshiken haka jinglut 1.50 lakh 2021-22 bad ka Graveyard Shed jong ka Shnong Nongtyrlaw haka jinglut 1.50 lakh jong u snem 2021-22.
Bad naka liang u MDC u Bah Balajied Ranee u la plie paidbah 2 tylli ki kam pynroi haka shnong Umklai ba kynthup ïaka paiñkhana paidbah haka ba latei haka jinglut kaba 1.30 lakh jong u snem 2020-21 bad ïaka kynroh jong ka iing mane balang katholik kaba la tei haka jinglut 5 lakh.
Hadien jong katei ka jingplie ïa kitei ki kam pynroi haki shnong, la ioh ruh ïaka jingïalang paidbah ha kaba la ïashimbynta lang da ki rangbah shnong ki dkhot jong ki committee shnong ki seng longkmie, ki khun samla bad kiwei kiwei ki riew rangbah.
