Shillong, Naiwieng 07 : U Ashik Bhownik u khlieh duh jong ki jingpyntrei ïa ki madan ïalehkai jong ka BCCI, u la ïaroh ba ka madan ïalehkai kriket ha Polo kadei kawei na kiba biang tam hapoh ka ri India. Ka jingtrei shitom jong ka Meghalaya Cricket Association ban tei ïa ka madan ïalehkai kriket ha Polo ka la pynlong ïa utei u nongïalam ka BCCI ban ai ka jingïaroh.
Na bynta baroh ki jingïalehkai jong ka samoi 2022-23, katei ka madan ka dang don hapdeng ka jingpeit jingkhmih jong ka BCCI, ha kaba ïa ki kyndon yn sa pynbna hadien.
Ka MCA ka la dep ban pynkha ïa ka jingtrei ban pynbna shuh shuh ïa ka madan tied bol, da kaba wanrah ka khyndew ba thymmai bad ki phlang ba thymmai naduh shwa ban shah pynthut ha ka khlam jingpang Covid-19 lyngba ka jingkyrshan jong ka BCCI.
U Ashish Bhowmick, u la pynkynmaw ïa ka jingïaid shaphrang ka jingshna ïa katei ka madan naduh ba u la wan ban jngoh hashwa ban wan lyngshop ka khlam Covid-19.
“Ka madan ka la kham bha bun shah ban ïa kaba mynshwa bad kumjuh ka madan tied bol, bad kadei kawei ka madan kaba la paka tam hapoh ri India,” ong u Bhowmick. “Ka long kaba eh ban pynbit pynbiang ïa ka madan ïalehkai kriket ha ka thaiñ North East namar ka jingjur slap bad ka sngi ka duna bad baroh ki jylla jong kane ka dong ka thaiñ ki ïakynduh jingeh lut.”
U la ai jingmut ruh kumno ban nang pynjanai halor kitei ki jingeh da kaba pynpaw ba ka Alotgre Ground ha Tura, uba la leit ruh ban juip, ka donkam katto katne ki jingpynjanai.
Na ka liangu Naba Bhattacharjee uba dei u President jong ka MCA u la ong ba ka Association kan pyrshang ban khleh lang ki phlang ha ki samoi ban wan.
“Ngi dap da ka jingsngewkmen ba u Bhowmick u lap bad shem ïa ka jinglong jingman kaba biang jong ka madan. Kumba nga la ong, ba ka jingeh kadei ha ka jinglong jong ka suiñ bneng,” u la ong. “Mynta ba u la wan ban jngoh, ha kaba kut jong ka samoi ïalehkai, ka madan ka don ha ka jingpeit bad jingkhmih jong ka BCCI.”
Watla mynta ka dang don hapdeng ka jingpeit jingkhmih jong ka MCA, hynrei ïa ki kyndon yn sa leh da ka BCCI, la ong shuh shuh u Bhattacharjee.
U Bah Gideon Kharkongor Honorary Secretary ka MCA u la ai khublei ïa u Bhowmick uba la pynlut ïa ka por ba kordor jong u ban wan ha Meghalaya bad pynpaw ka jingkyrmen skhem ba ka madan ïalehkai ha nongbah Shillong bad Tura yn sa ïoh ka jingithuh kum ka madan jong ka BCCI.
La pdiang burom ïa u Bhowmick da ki nongkitkam ka MCA bad ka Shillong Cricket Association, ba kynthup u Bah Rayonald Kharkamni Vice-President ka MCA, Honorary Treasurer Dhrubajyoti Thakuria, MCA Chief Curator Peter Jarman Lamare bad u Bah Peter Macdonald Kharsawian President ka SCA.
