Wan ïuh kjat u Myntri sorkar pdeng ha Ri Bhoi kum ka Aspirational District, ban khia ban ïada kyrpang ïa ka mariang
![](https://mawphor.com/wp-content/uploads/2022/11/WhatsApp-Image-2022-11-04-at-7.07.56-PM.jpeg)
Nongpoh, Naiwieng 4: U Myntri ka sorkar pdeng, ba dei peit ïa ka tnad Jal Shakri, u Gajendra Singh Shekhawat mynta ka sngi u la wan ban iuh kjat ha Ri Bhoi na ka bynta ban ïa kynduh ïa ki ïa ki ophisar sorkar ban wad jingtip halor ki kam pynroi ba la pyntreikam ha kane ka District kum kawei na ka ‘Aspirational District’ ba la mang kyrpang ïa ki kam pynroi ban kyntiew ïa ka roi ka par jong kane ka District lyngba ki song pynroi na ka sorkar kmie.
U Gajendra Singh Shekhawat mynta ka sngi u la leit ban jurip ïa ka Aganwadi Centre ha Umdihar ban ïa kynduh kyrpang ïa ki khynnah bad hadien kata u la pynlong ïa ka jingïakynduh lang bad ki ophisar sorkar ha Conference Hall ka ophis u Deputy Commissioner ka Ri Bhoi ban wad jingtip halor ki jingpyntreikam ïa ki song pynroi lyngba ka sorkar kmie ha kane ka District ba la tip kum ka Aspirational District.
Ha kane ka jingïakynduh lang la shim bynta ruh da ki ophisar sorkar na ki tnad treikam bapher bapher ka Ri Bhoi bad kynthup ruh ki ophisar kiba synrang ïa u Myntri ka sorkar pdeng, ha kaba ïa kane ka jingïakynduh lang u Deputy Commissioner ka Ri Bhoi, u Arpit Upadhay, u la ai ka jingpynshai halor shibun ki kam pynroi kiba ki la leh lyngba kita ki song pynroi kum ka Aspirational District.
Lyngba jong kane ka sngi u la leit ruh ban shim bynta ha ka prokram ha District Library Auditorium Hall, ha kaba la sam ïa ka song pisa na ka bynta ki Village Community Felicitators lyngba ka Meghalaya Community Led Landscape Project, ka Meghalaya Basi Development Authority kiba dei ki kam kiba ki trei ban ïada ïa ka mariang ban pyneh pynsah ïa ki umbam umdih bad ruh ki khlaw ki btap.
Na ka liang u Myntri ka sorkar pdeng, u Gajendra Singh Shekhawat u la pynpaw ruh ba u sngewkmen ban ioh ban ïa kynduh ïa ki ophisar bad ki nongshong shnong ka Ri Bhoi, ha kaba kum ka Aspirational District ki la trei ryngkat ban kyntiew ïa kane ka District ha ka roi ka par bad u la pynpaw ruh ba ka sorkar BJP ha ka jingïalam u Narendra Modi u la leh shibun ki kam kiba khraw bad ba la wan rah shibun ki kam pynroi ban kyntiew ïa ka ri India hi baroh kawei.
Kawei kaba u la kham ban khia ïa ki paidbah ka dei ka jingdonkam ban don ka jingkitkhlieh ban ïada kyrpang ïa ka mariang ha kaba lyngba ki skhim sorkar ki dei ban pyntreikam hok, namar ka thong jong ka sorkar ka long ban pynlong ïa ka ri India kaba jyrngam bad ruh ba rad dyngkhong na ka jingpynjot ïa ka mariang kaba long ka jingma naka bynta ka pateng ka ban sa wan, la bynrap u Myntri ka sorkar pdeng, u Gajendra Singh Shekhawat.