Jurip ka JAC ïa ka surok Nongpoh-Umden-Sonapur

Nongpoh, Naiwieng 4: Na ka daw ka jingjynjar bad ka jingsyrtok ki paidbah ha ka leit ka wan na ka daw ka jingsniew palat ka surok na Nongpoh-Umden-Sonapur, kaba dei kawei na ka surok kaba pynïasoh da ki spah tylli ki shnong ban pynpei lyngba sha ka jylla Assam, ka Joint Action Committee (JAC) ba la synrop lang da ki seng bhalang, ki rangbah shnong bad ki nongñiah kali kamai mynta ka sngi ki la leit ban jurip ïa kane ka surok shi bynta ban pynpaw ka jingsngewkhia halor ka jingsniew palat kane ka surok paidbah.
Kane ka surok ka dei kaba pynïasoh na ka surokbah National Highway-6 ha Ri Bhoi na Nongpoh ban ïaid lyngba ka Umden bad pei lyngba sha Sonapur jong ka jylla Assam bad kane ka surok ka dei ruh ka surok kaba donkam tam na ka bynta ki paidbah ka thaiñ Umden Nongtluh ha Ri Bhoi.
Ka JAC ba kynthup lang naduh ki nongïalam ka RBYDSO, ki Rangbah Shnong, HYC bad ka Umden Area Local Taxi Driver owners Association ki la shim ruh ïa kane ka sienjam ban jurip ïa kane ka surok, ka dei namar ba ki paidbah katei ka thaiñ ki la wan ud wan nam bad ki la pynpaw ruh ka jingeh kaba khraw halor ka jingsniew bad ka jingjot katei ka surok paidbah.
Na ka liang ka JAC ki la leit ban jurip mynta ka sngi ha shi lynter katei ka surok bad ki la lap ruh ba kane ka surok ka la sniew sha ba palat bad la donkam ba ka sorkar kan siang rong thymmai noh ban suk ki paidbah ha ka leit ka wan.
Haba kren naduh u Chairman ka JAC, u Bah Mathaias Syiem, u Secretary ka JAC bad uba dei ruh u Secrertary ka RBYDSO, u Bah Kerbok Malai ki la pynpaw ba ka JAC ka dap shisha da ka mynsiem jong ka jingsngewkhia, namar ka jingsniew kane ka surok ka la ktah shisha ïa ki paidbah ha ka leit ka wan bad namar ka jingsniew ka surok wat ki Ambulance kit nongpang ruh ki la kyntait ban ïaid na katei ka surok.
Na ka liang u Bah Kerbok Malai u la ther tyngeh ruh ïa ka sorkar MDA kaba pynslem ban siang rong noh ïa kane ka surok bad u la pynpaw ruh halor kane ka jingsniew ka surok na ka liang u Symbut Myntri ka sorkar, u Bah Prestone Tynsong u la dep ban kular la bunsien ban pynbha ne siang rong noh ïa kane ka surok, hynrei kumba long haduh mynta kita ki jingkular ba la dap mang pisa ka la shu kut tang ha ka jingkular bad katba ki paidbah nongshong shnong pat ki syrtok ha ka leit ka wan na ka jingsniew kane ka surok.
Namarkata, na ka liang ka JAC ka la dawa na ka sorkar MDA ba ka dei ban pynsted noh ha kaba siang rong bad pynbha ïa katei ka surok kumba la kular da u symbut myntri bad lada ka dei tang ka jingkular kai kane ka long ka jingpynbiej ïa ki paidabh katei ka thaiñ, la bynrap u bah Kerbok Malai.
Na ka liang u Bah D. Shylla, SDO ka tnad PWD Nongpoh Division bad uba la don lang ha kane ka sngi ban jurip ïa katei ka surok, u la kular ba ka tnad PWD kan sa shim khia ban pynbha ïa kane ka surok ha ki bynta kiba sniew kumba 18 km ei ei katba ka sorkar kam pat lah ban siang rong pura ïa katei ka surok ba la donkam ban pynbha kumba la dawa ki paidbah.