Shillong, Naiwieng : Ka Edge 10, ka la dep ban aiti sha ka sorkar lyngba ka Meghalaya State Olympic Association ïa la ka jong ka kaiphod treikam jong ka ba la tip kum ka talent Identification Phase -1, ne ïa ka kaiphod jong ka jingdon ki khynnah bad ki samla jong ka jylla ïa katta ka sap ka phong ban lah ban sain dur ne ban hikai pyntbhit ïa ki ha kiba bun bah ki kam ïalehkai.
Kane ka dei ruh shi bynta ba shisien ka sngi kan sei wat ïa u ne ka nongïalehkai kiba lah ban kynjoh ïa ka thong ban mihkhmat ïa ka ri ha ki lympung bah ïalehkai kiba heh ha ka pyrthei kum ka Olympic, lada shim khia ban bud ïa ki lynti bad ki jingïa jingmut jong kane ka kynhun.
Haba kren bad ki lad pathai khubor, u Working President ka Meghalaya State Olympic Association u Bah John F Kharshiing, u pynpaw ba ka jingkwah jong u ban pathai paidbah ïa kane ka kaiphod jong ka Edge-10 kaba la dep ban pynbna ïar da u Myntri Rangbah Conrad K. Sangma, ka long ban pyntip sha ki paidbah ba haduh katno ka jylla Meghalaya ka long da shisha kaba la kyrkhu ba kan don ïa ki khynnah haduh ki samla, kiba don ha ki ïa katta ka sap barieh bad ba nylla ban pyntbit ha ki kam ïalehkai.
Shwa ba ka Edge 10 kan aiti ïa kaneka kaiphod lem bad ka jingïatrei lang bad ka MSOA bad kyrshan da ka that Directorate of Sports & Youth Affairs, ka la lah ha kaban pynlong ïa ka jingleit hiar sha baroh ki 12 tylli ki district ba don ha ka jylla, ha kaba la lah ban pyndep ym duna ïa kumba 24,000 ki test ba la pynlong naduh ka 9-29 tarik Naitung 2022.
Dei ynda haba la dep ban pynlong ïa kane ka test ba la lap ba la don shisha ki khynnah kiba pynpaw ïa ka sap kum ka nuksa ha ka vertical jump u Lambert Wahlang ka West Khasi Hills u la lah ban kynthih ïa ka jingjrong kaba 78.3cm bad 10m Speed Ladder Run kaba long 2.75 ïa ki kynthei bad 2.35 ïa ki synnrang bad hangne u Dimsrang Sangma ka West Garo Hill u la lah ban pyndep ïaka thong kaba long 2.41.
Kane ka kaiphod u Ïan Campbell ba dei ruh u nongïalehkai olympic ba la shongthait ka Australia ka pynpaw ba kum ka jylla ka dei kaba la kyrkhu bha da ka jingdon jong ki sap ba nylla bad ba donkam ban sain dur ïa ka lawei ka jingim ïalehkai ka jong ki, kaba na kane ka jingwan ban wad sap.
La lap ruh ba ki don da ki spah ngut ki shynrang bad kynthei, kiba donkam ban don noh ha ki shlem sain dur (sports hostel) ne ai jinghikai hapoh ka jingpeit bad khmih ki nongsumar bad ki nonghikai (coach) ba janai ka jylla, kaba da kumta ka thong ban lah ban sei ïa ki nongïalehkai ba kynsai ha ki Olympic, Asian Games, Commonwealth Games bad kiwei kiwei kan sa lah ba kan urlong.
