Rah u Iwelljohn Ramsiej bad ka Kyntimon Marweiñ ha ka ‘Run for Unity 2022’ ha Mawkyrwat

Mawkyrwat, Risaw, 31: U Iwelljohn Ramsiej uba la mareh 19:53:42 bad ka Kyntimon Marweiñ kaba la mareh 23:26:59 ki long ki ar ngut ki nongmarehthong kiba la poi sha ka jingjop ha ka lympung jingïakop mareh kaba la tip kum ka ‘Run for Unity’ kaba 6 kilometers ba la pynlong da ka ophis jong u District Sports Officer, South West Khasi Hills District ryngkat ka jingiatreilang jong ka District Sports Promotion Society, South West Khasi Hills District.
Katei ka jingïamarehthong ka long kum shibynta jong ka jingkynmaw burom ïa ka sngikha ba 147 snem jong u Sardar Vallabhai Patel uba la long u Home Minister ba nyngkong & Deputy Prime Minister (PM) jong ka Ri India naduh u snem 1947 haduh 1950 bad kumjuh ruh ka jingrakhe ïa ka ‘Rashtriya Ekta Diwas’ lane ka ‘National Unity Day’. Ïa ka jingmareh la sdang ba phyllaw jong ka Circuit House sha Ïew Mawleiñ, Jakrem bad wan pynkut biang ha ka jaka ba sdang ha kaba da ki spah ngut ki khynnah bad ki samla shynrang bad kynthei.
U kongsan bad uba la shim ruh ïa ka bynta ban kaweh ïa ka lama jong ka jingsdang ïa ka jingmarehthong u dei u bah Steveford Marweiñ, MCS, Extra Assistant Commissioner, South West Khasi Hills District ha ryngkat ka jingïadonlang u bah Ehbok Syiemlieh, PTI jong ka ophis u District Sports Officer (DSO), South West Khasi Hills District.
U bah Steveford Marweiñ, MCS, Extra Assistant Commissioner (EAC), South West Khasi Hills District haba kren kum u kongsan u la pynpaw ka jingaikhublei na ka bynta ki hep kiba rit bad kumjuh ruh ki samla shynrang bad kynthei kiba la wan ban ïashimbynta ha kane ka jingïamareh thong kaba la tip kum ka ‘Run for Unity’ kaba dei ruh kumjuh shibynta ban pynkynmaw ïa ka jingprat lynti jong uwei u ‘riew khraw jong ka Ri India u Sardar Vallabhai Patel ha kaba naduh ki snem kiba la leit u kwah ïa ka jingïalong shitylli naduh ki shnong ki thaw, ka imlang ka sahlang bad kumjuh ruh ha ka ri bad ka jaidbynriew baroh kawei.
Haba kren bad ai mynsiem na ka bynta ki nongïashimynta ha ka jingïamreh, u la ong ba ha ka jingïakop kin don beit kiba jop bad kiba rem. Namarkata, kiba jop kim dei ban sngewsarong noh hynrei ki dei ban nangtrei shitom shuh shuh bad kiba rem ruh kim dei ban noh mynsiem haba ki la shah rem ne ym poi sha ka thong ba ki kwah hynrei ki dei ban trei shitom bad ïai kilanmet manla ka por.
Kiwei pat ki nongjop kiba la ïoh pdiang ïa ka khusnam ki long ka Daplin Wahlang kaba la mareh 25:32:59 bad ka Bandasharai Marweiñ kaba la mareh 25:50:63 kiba dei jong ki kynthei. Nangta, sha u Jomsingstar Ramsiej uba la mareh 20:15:94 bad u Obanshan Nongrum uba la mareh 20:35:47 kiba dei jong ki shynrang.
Ha kane ka sngi la ioh ruh ban sam ia ki khusnam kyrpang kata sha u Stilin Jyrwa, u Risuklang Lyngdoh, u Kduplang Kharjahrin, u Edmon Wahlang bad u bah Swonding Mawlong bad kumjuh ruh sha ka Ibandarisha Kharwanniang, ka Wanresful Jyrwa, ka Ikyntiewshisha Ramsiej, ka Naibanshai K. Jahrin bad ka kong Kmoiñ Wahlang.