Ka Meghalaya bad ka jingbym ïoh kam ïoh jam

0

Ka ishu jong ka jingbym ïoh kam ïoh jam ki Samla kadei ka ishu kaba khluit bha ha kine ki sngi, khamtah hadien ka jingïaid rally ka Seng FKJGP myn ha ka sngi thohdieng. Ka Meghalaya kadei kawei ba ki jylla kiba bun bha ki samla ki bym donkam don jam bad kane kadei kawei na ki daw kiba la pynlong ïa ki Samla ban lynga ban pisa mynsiem. Kane ka jingbym ïoh kam ïoh jam kadei kawei ka jingkhuslai mynsiem jong ki kmie ki kpa ruh ha kine ki sngi kiba mynta. Kum ki kmie kpa ki kwah ba ki khun hadien baladep ka jingpule kidei ban ïoh la ka jong ka kam ka jam, khnang ba kan long ka jingïarap lem ha ïing hasem bad kan don ruh ka lawei kaba shgaiñ na ka bynta jong ki.
Dei namarkane ka daw la ïohi ba ki don bun ki samla, wat ki samla kynthei ruh kiba mih na la ki jong ki ïing ki sem bad na ka jylla ban leit trei sha kiwei pat ki bynta jong ka ri India. Kane ka jingmih ki samla na la ka jong ka jylla kam dei tang kito kiba la nang la stad, hynrei wat kito kib dang duna ka jingnang jingstad ruh ki mih ban leit wad kam noh sha kiwei ki jylla, da kaba trei ha ki Company, ha ki Hotel, ha ki Dukan bad kiwei kiwei de ki kam kiba ki ïoh.
Lada ïakren ïa ki kam sorkar ha Meghalaya, kiba bun ki la duh jingkyrmen namar ba ki kam ki jam ki la duna shaba palat. Haduh mynta ki dang don bun tylli ki Post kiba ka sorkar kadei ban thung, ki la shu sah thylli khlem thung satia. Ka nuksa ki kam Nurse kiba lait da ki spah tylli, kiba ki samla baladep pule Nursing ki ladep ban ïaleh eksam bad interview haduh mynta ruh ym pat shym la pynbna ïa ka result. Nangta ki kam Pulit kiba da ki spah ngut ruh ym pat pynbna result haduh mynta. Nangta katkum ka RTI kaba la ïoh da u Bah Disparsing Rani ruh ka paw shai ba da ki hajar tylli ki Post kiba lait ha ki tnad treikam bapher bapher jong ka sorkar ym shym la thung satia. Ka daw baroh kadei namar ka jingkyrduh pisa ka sorkar kaba ym shym la lah ban thungkam satia.
Hynrei ym tang ki kam sorkar ba ki briew ki ïakren, hynrei wat ki kam ki jam ki bym dei jong ka sorkar ruh ka long kaba eh ïa ki samla ban ïoh kam. Ka nuksa kaba rit eh ka long na ki Karkhana dewbilat kiba la wan seng ha kane ka jylla. Ki don bun tylli ki karkhana dewbilat ha kane ka jylla, hynrei katno ngut eh ki samla jong ka jylla kiba ïoh kam ïoh jam ha kine ki karkhana. Wat tang ïa ka karkhana dewbilat ha Mawmluh kaba ju ai jam da ki spah ngut ki briew, mynta ka la troiñ bad ka la pynkylla khlem kam khlem jam da ki spah ngut bad ka sorkar ruh kam shym la shimkhia ban pynpeit ne ban weng ïa kane ka jingeh.
Nangta lada peit ha ka Tourism Industry ruh kaba dei kawei na ki lad aikam aijam ïa ki samla kiba ioh kam dei tang kito kiba don sha ki nongkyndong, namar ba ki ai kam ai jam lyngba ki Home Stay, ki Holiday Resort, ki Restaurant bad kiwei kiwei. Hynrei ki Hotel kiba heh ha Shillong ki samla trai jylla kiba trei ki duna palat.
Hynrei ym lah ban shu kynnoh beit tang ïa ka sorkar ba kam lah ban aikam aijam, namar ba ki samla jong ka jylla ha kiba bun ki khep, kidei kiba da jied shiah ïa ka kam ba kin trei. Kumba 20 ne 25 snem eiei mynshuwa hato ju ïoh sngew ba ki samla Khasi kin leit mareh kam Pulit. Bun ki ïakren beiñ. Dei nata ka daw ba ka tnad Pulit ka bun bha da ki briew ki bym dei ki trai jylla. Nangta ha ki karkhana ruh tang la shitom ka kam khyndiat ruh ki don kiba phet noh. Nangta ki don bun ki samla shynrang kiba la ïoh lad ban leit trei shabar lyngba ka prokram skill development, hynrei kiba bun ki wan phai noh sha ïing. Kine kidei tang ka nuksa kaba rit.
Khnang ban lait na ka jingkyrduh kam, ki samla jong ka jylla kidei ban long kiba kloi ban trei ne shim ïa kano kano ka kam kaba sngewthuh ba kan long ka jingkyrshan ïa ki shimet bad ïa ka ïing ka sem. Sngewdei ban ai jingïaroh ïa kito kiba la mih shakhmat ban trei ïa ki kam kat kaba ki ïoh, wat ïa kam kitnong ne ka kam daju ha ïewduh ruh.

Leave A Reply

Your email address will not be published.