Shillong, Risaw, 19: Kumba u la thrang ban ïakhun kumta wat napoh phatok ruh ka BJP kan pynïakhun beit ïa u Bernard N. Marak MDC ka Tura pyrshah ïa u Conrad K Sangma Myntri Rangbah ka jylla na ka South Tura Constituency ha kane ka election MLA 2023,ïathuh u nongïalam ka BJP uba dei u National Executive Member u bah A.L Hek.
U bah A.L Hek u la ïathuh mynta ka sngi “Ka BJP ka la dep rai ba u Bernard un long beit u kyrtong ka BJP ban ïakhun ïa u Conrad na ka South Tura Constituency. Wat la um pat ïoh jamin ruh un ïakhun beit ïa ka election napoh phatok”.
U bah Hek uba long u MLA ka Pynthorumkhrah u la ong ba ki don bun ki kyrtong kiba ïakhun ïa ka election napoh phatok ha ki por ba la dep ruh. U la ong wat u Chairman ba rim ka HNLC u bah Julius Dorphang ruh haka electoin ba la dep u ïakhun ïa ka election na ka Mawhati Constituency napoh phatok bad u rem ruh tang khyndiat vote.
U bah Hek u la ong “ Ki jingkynnoh ba harrukom kin lah ban jia beit ïa uno uno u riew saiñ pyrthei hynrei katba ym pat lah ban pynshisha ne rai pynrem hakhmat ka ïing bishar, ki jingkynnoh kin kut tang ha ki jingkynnoh”.
U bah Hek lem bad ki nongïalam ka BJP dang shen ki la hiar sha ri lum Garo ban ai mynsiem ïa ka long ïing jong u Bernard. “ Ngi la batai ha ki khun ki kti jongu ba ka party ka don ryngkat bad u bad wat duh jingkyrmen bad sngew ba phi la shah ieh khunswet” ong ki nongïalam ka BJP ïa ka kurim u Bernard.
U la ïathuh ba ki paidbah ruh ki ai ka jingkyrshan ba pura ïa u Bernard wat la u shah kem bad shah kynnoh ruh. Ha kane ka jingleit sha Garo ki la pynlong iakiba bun ki jingïalang ha North bad South Tura Constituency ban pan ka jingkyrshan na ki paidbah.
U bah Hek ula ong ba ha kane ka kynti 2023 ka BJP kan jop beit ym duna ïa ka 15 seat hapoh Meghalaya. U la ïathuh ba kumba long mynta ki don 5 ngut ki MLA kiba la pynpaw ba ki kloi ban wan pynïasoh noh bad ka BJP hynrei ki dang ap tang ïaka por bad ka jingpynshisha na ki.
