Don ki ‘riewshimet kiba leit lum ‘EPIC’ bad ‘passbook’ ban ai skhim 5 hajar: Banteidor
Shim kabu ban pynkylla skhim elekshon ïa ka skhin sorkar

Shillong, Risaw, 19: Ka Election ruh ym pat pynbna tarik, ki la don kiba shim kabu bad thmu ban pynkylla skhim election ïa ki skhim sorkar da kaba thmu ban ïalam bakla bad pynbiej ïa ki paidbah da ka jingleit pan EPIC bad Xerox Copy ïa ki Pass Book ha ka Mawkynrew Constituency.
Kumta halor kane u Bah Banteidor Lyngdoh, MLA ka Mawkynrew Constituency bad Myntri ba dei khmih ïa ka tnad kam rep ka Sorkar Jylla u la ong ba ki don ki ‘riewshimet khlem da ïoh bor kiba la leit lum ‘EPIC’ bad xerox copy passbook na ki nongshong shnong na ki shnong kiba hap ha ka Mawkynrew C&RD Block bad Mawryngkneng C&RD Block kiba hap pat ha ka Mawkynrew Constituency da kaba kular ban ai skhim mar san hajar tyngka ïa ki.
Hadien ba u la ïoh pdiang ïa ka jingujor na ki paidbah ba kim sngewthuh sngewthaw shuh ïa ka rukom pyntreikam ïa ka skhim jingïarap na ka FOCUS bad FOCUS Plus kiba dei ki skhim jingïarap pisa ka Sorkar Jylla sha ki nongrep kiba don ha ki Producers’ Group khamtam hadien ba la don ka jingwan pan EPIC bad passbook, u Bah Banteidor u la lum da ka jingïalang ba kyrkieh ha ka step 19 tarik u Risaw, 2022 ha kaba u la khot ruh ïa ki BDO kumjuh ki ophisar kiba pyntyllun ïa ka FOCUS bad FOCUS Plus lyngba ka Meghalaya Basin Development Authority na kitei ki ar tylli ki Block ban pynshai sha ki paidbah kiba kynduh jingeh.
Haba kren sha ki lad pathai khubor hadien ka jingïalang pynshai, u la ong ba ka long ka jingdon ki ‘riewshimet kiba leit pan passbook bad EPIC ka pynlyngngoh namar ka dei ka skhim jingïarap na ka Sorkar. “Ki paidbah kim dei ban sngewthuh bakla da ka jingïalam bakla ki riewshimet ki bym dei ki briew jong ka Sorkar kiba leit lum ‘EPIC’ bad passbook”, u la ong da kaba bynrap ba ka long kaba ma namar ban shu ai ïa ki Account Number sha ki briew kiba lah ban shim kabu.
Da kaba kyntu ba ki paidbah ki dei ban sngewthuh bad wad bniah bha, u la pynkynmaw ba ha ki snem ba la dep la don ki briew kiba pan passbook bad account number da kaba kular ai jingïarap pisa bad phah soi ha ka kot sada. “Hadien pat kita ki briew ki ïoh ïa ka pisa 10 hajar tyngka bad hadien san bad hynriew bnai pat poi ki jingthoh na Bank sha kita ki briew baroh kumba 70 haduh 80 ngut ba ki hap wan siew ïa ka ram ba ki la shim kumba 2 lak”, u la ïathuh.
Haba kyntu ba ki paidbah na katei ka khana jingjia ba ki dei ban pyrkhat bha bad ym dei ban shaniah klumar ïa ki bym dei ki briew jong ka Block ne ka Sorkar , u la ong ba halor ka jingshah thok kitei ki paidbah nongshong shnong mynta ka mukotduma ka la poi ha ka ban tohkit da ka CBI.
U la ong ba tang ki volunteer kiba la thung da ki ophis BDO ki lah ban pan ïa ki passbook ne EPIC ban pynpoi sha ki Block. U la ong ba tang kiba la dei ki dkhot jong ki Producers’ Group kin ïoh ïa ka jingïarap ei ba mar san hajar tyngka iwei i dkhot bad ki bym don ha ki Group kin nym lah ban ïoh jingïarap pisa da lei lei ruh.
Ha ka jingïalang la ïoh ïa ka jingkren pynshai na u Bah Albinus Nongkynrih, Assistant Manager incharge EFC, Mawryngkneng Block, u Bah G Dhar, BDO ka Mawkynrew Block, ka Kong AR Kynta, BDO Mawryngkneng Block, ki nongtrei na kitei ki Block sha ki nongïalam shnong, ki nongshong shnong bapher bapher.