Hukum ka HC ïa ka Sorkar Assam ban pynshisha ïa ka jingkit dewïong beaiñ na Meghalaya

Shillong, Risaw, 19: Ka ïingbishar High Court jongka jylla Meghalaya ka la hukum ïaka sorkar Assam ban ai jingpynshai halor ki jingkynnoh ba u dewiong uba la tih beaiñ la khaïi tuh sha Assam bad hadien kata da kaba shu thaw thok ïa ki kot ki sla la shalan pat ïa ujuh u dewiong sha Bangladesh lyngba ka Meghalaya hi.
ïa kane ka hukum la pynmih da ka ïing bishar mynta ka sngi halor ka jingkynnoh jong u Champer M Sangma bad Maikel T Sangma ba u dewiong ba la tih beaiñ ha Meghalaya la kit tuh sha Assam bad hadien kane une u juh u dewiong u wan phai sha Meghalaya da ki kot ki sla thok ba la pynkhreh ha Assam bad shalan pat ïa u sha Bangladesh.
“ Kumta la bthah ïa ka sorkar Assam ba kan ai ka jingpynshai ( Affidavit) hadien ba ka la dep tohkit halor ka jingkynnoh ban lap la kine ki jingkynnoh jong kine kiba ujor mukotduma ki long kiba shisha ne em. Hadien lai taiew yn sa shong bishar katba dang ap ïaka kaiphod na ka sorkar Assam. Ka jingbishar kan long ha ka 14 Naiwieng 2022” ong ka ïing bishar.
Ka hukum ka pynpaw ruh ba na ka liang ka sorkar jylla ka la ai ïa ka kaiphod jingtohkit majistor bad la lap ba ki don ki kot ki sla bad la siew ruh ïaka GST halor u dewiong. Ka sorkar jylla ka ai ruh ïaki receipt GST ba la dep siew kumta ka sorkar ka donkam shuh ban dang bteng jingtohkit halor kane ka jingkit ïa u dewiong. Kumjuh ruh ka sorkar Assam ka dei ban pynpaw ïa ki receipt jong ki GST halor u dewiong.
Hynrei na ka liang ki nongujor ki la pynpaw ba ka don beit ka jinglehbeaiñ ha kane ka kam khaïi dewiong da ka jingïadon kti ki briew kiba napoh ka jylla hi.
“ Hooid wat la ym don ki sakhi sabut kiba biang ban pynshisha, hynrei kine ki nongujor mukot duma ki kynnoh ba u nongshah mudui uba khatsaw u lah ban batai halor kine ki kot ki sla ba la shu leh thok namar une u dewiong uba khaïi beaiñ na ka jylla u wan phai biang sha ka jylla da kita ki kot ki sla bad shalan pat sha Bangladesh.
Na ka liang ka sorkar Assam ka la pyntip ba ki don katto katne tylli ki case ba la rejister halor kane ka jingkhaïi beaiñ ïa u dewiong. Hynrei ban ïoh ïa ka jingbatai ba bniah ki dang ap ïa ka por halor kine ki case”.