Shillong, Risaw, 19: Ka ïingbishar High Court jong ka jylla ha ka sngi Balang ka la pynngat kyndon jingpynkheiñ hukum ïing bishar ïa u Secretary ka tnad Kam Pohïing namarba um shym la burom ïa ka hukum jong ka ban jubab ïa kiei ki lad ki lynti ba la shim ne la kem ïa kito kiba ïadon kti ha ka kam ïathied kali ha ka tnad pulit.
“Ai ba ka kyndon aiñ Contempt kan long pyrshah ïa u Secretary ka tnad kam pohïing ka jylla namar u khlem burom ïa ka hukum jong kane ka ïing bishar da kaba leh bym salia ïak a hukum bad ïa kane yn sa shongbishar biang ha ka 2 tarik Naiwieng 2022 ong ka hukum ba la pynmih da u Chief Justice Sanjib Banerjee bad Justice W Diengdoh hadien ba la bishar ïa ka mukotduma PIL ba la ujor da u Riewad Vicharwant Warjri bad kiwei.
Ka ïing bishar ka la bthah ba ka tnad pulit ka dei ban pyntreikam ïa ka aiñ pyrshah ïa u secretary halor kane ka jingpynkheiñ hukum ïing bishar jongu.
Ha ka hukum ba la pynmih ha ka 30 tarik Nailur 2022 ka ïing bishar ka la bthah ïa ka sorkar ba kan ai ïa ka kaiphod ha ka 17 tarik Risaw lyngba u Secretary ka tnad kam pohïing ban batai kiei ki lad kiba ka sorakr ka la leh ne la kem ne em ïa kiba donkti ha kane ka kam beaiñ hapoh ka tnad pulit hynrei ym shym la ai kano kano ka jubab ruh sha ka ïing bishar da u Secretary.
Ka ïing bishar ka ngeit skhem ba ka sorkar jylla kan shim khia bha halor kane ka kam.
Na ka liang ka sorkar ka la pyntip ba ka ophis u DGP ka la ai ka kaiphod jingtohkit ha ka 11 tarik Risaw bad kumjuh ruh ïaki kyndon ba la pynngat ïa u ophisar ba donkti. Bad mynta ka jingpynkhreh ïa ka Departmental Proceeding ka dang ïaid pyrshah ïa u ophisar ba donkti.
