Ka ‘High Level’ dei ka kynhun jong kiba khaïi dewïong be-aiñ: Hek

0

Shillong, Risaw, 19: U nongïalam ka BJP ba dei ruh u Myntri barim ka sorkar jylla, Bah AL Hek ha ka sngi Balang u la kynnoh ba ki ‘high level’ ka dei ka kynhun jong kito kiba donkti ban pynïaid beaiñ ïa u dewïong bad ba peit pat da ki ‘top level’.
Da kaba ïaroh ïa ka hukum ba pynmih da ka Meghalaya High Court kaba bthah ïa u Chief Secretary bad Director General of Police (DGP) ba kin kem lut ïa baroh kiba donkti ha ki kam ba ïadei bad u dewïong beain ha ka jylla, u Bah Hek haba kren bad ki lad pathai khubor u la ong ruh ba ka sorkar MDA ka la phlop ha ka rukom treikam namar ïa ka jingpynïaid iew ïa u dewiong la tehlakma da ki ‘high level’.
“Mynta, da ka jingbthah jong ka Ïing Bishar ngam tip shuh kumno ki high level kin leh,” u la ong.
Namar man ka por na ka liang u Myntri Rangbah ka Jylla kumjuh ruh u Symbud Myntri Rangbah ki bteng beit ban kyntait ïa ka jingdon ki high level bad ruh ka jingpynïaid iew beain ïa u dewiong, na ka liang utei u Myntri barim ka sorkar jylla u la ong, “Kumno phi lah ban kyntait ba kim don ki high level?”
Nalorkata, u kynnoh ruh ba ka high level kadei ka kynhun kaba wan naduh top level, tangba kam dei pat kaba da ïaid da ka lynti kaba dei. “Kane ka jia shisha bad dei na kata ka daw ba sa mih ki jingkhaïi beain ïa u dewiong ha Meghalaya bad phi ïohi ruh ba bun bha ki trok kit dewiong kiba kylla lyndang ha man ki surok bad kane ka jia jan man ka sngi,” u la ong.
Shuh shuh u ong ruh ba ïa katei ka ishu high level mynta ki la ïakren wat ha dukan sha bad ruh wat ha ki ophis sorkar bad wat ha ïew ha hat ruh la ïa kren lut shaphang kata. U ong ruh ba lada kam don satia ka jingkhaïi beain ïa u dewiong, ka High Court kan ym da tuklar halor katei ka bynta.

Leave A Reply

Your email address will not be published.