Ryngkat ka takma rnong wanrah u bah Donbok na lympung pyni dohksah ha Vietnam

Shillong, Risaw 19 : Ki paidbah ka nongbah Shillong kynthup naduh ki nongïalam sengbhalang, ki nongïalam jong ka Seng Samla Mawlai Pyllun, nangta jong ka TULBA bad ruh ki nongïalam jong ka Bouncer Association of Meghalaya ki la leit ban pdiang burom ïa u Bah Donbor Rumnong uba la wanphai ryngkat ka takma rnong kaba u la jop na ka lympung pyni dohksah kaba long ha Vietnam ïa kaba la tip kum ka WFF PRO AM Asia Pacific Championship ha ka 14 tarik bad kut noh ha ka 16 tarik u Risaw, 2022.
Ha kane ka sngi ki paidbah ki la mih shaduh surok ban pdiang burom ïa utei u rangbah uba la wanphai sha la shnong ryngkat ka riam tynrai. Da katei ka jingjop, u Bah Donbor u la shah jied ruh ban leit shim bynta sa ha ka lympung ïakhun kaba kham heh kaban sa long ha Germany ha u snem 2023.
Bun ki bym tip ïa utei u rangbah uba la wanrah burom ïa ka jylla da ka jingjop ha ka lympung Mr. India ruh bad dei kane hi kaba pynlong ïa u ban ïoh leit shim bynta wat ha ka lympung jong ka Mr. Asia Pacific Championship.
Na ka liang u Bah Donbor haba kren ha ka jingïalang pdiang burom kaba long viewpoint Mawlai, u la ïathuh ba ha katei ka lympung ïakob ki la don haduh 200 ngut ki nongïashimbynta na ki 21 tylli ki Ri jong ka Dewbah Asia bad ka ri Australia bad New Zealand bad ka jingïakob ka long ha ki 3 tylli ki kyrdan kata ka Open Body Building, Mens Physique bad Classic.
U la ïathuh ruh ba hadien ba u ïohi ïa ki nongshim bynta na kiwei pat ki ri ba ki kham heh u la sdang ban duh mynsiem hynrei da ka jingai mynsiem jong u President ka Word Fitness Organi sation u la ïoh biang ïa ka jingkyrmen ban aireng lang ha katei ka lympung kaba don da ki spah ngut ki nongshim bynta kiba pawnam na kylleng ki ri. “Nga hun haba nga ïoh ïa ka takma rnong nmar uba wan ba nyngkong bad uba ba-ar ki dei hok ban ïoh ban ïoh ïa kitei ki takma,” u la ong.
Da kaba kyntu ïa ki samla ba kin mih shakhmat sha katei ka lympung, u Bah Donbor u la ïathuh khana ruh ba naduh dang rit u la kwah ban long kum u aktor heh ksah ha ki phlim phareng u Arnold Schwarzenegger bad kane hi ka la ai mynsiem ïa u ban ïakhun haduh ba un da long kumba long mynta.
Shwa kane kitei ki kynhun bapher bapher ki la iaid rally da ka kali ter ter naduh katei ka jaka.