Shillong, Risaw 14 : U Myntri Rangbah ka jylla u Conrad Sangma ha ka sngi Thohdieng ha ka jingplie ïa ka Hotel Vinanta Meghalaya u la ïathuh ba kum shi bynta ban kyntiew ïa ka jngohkai pyrthei ha ka jylla na ka liang ka sorkar jylla lyngba ka tnat Tourism ka la bei tyngka na bynta ka kynhun ïalehkai phutbol ka North East United Football Club bad na ka liang ka club kan sa buh ïa ka shap jong ka Meghalaya Tourism ha ka jersey jong ka ban pynphriang sha ka pyrthei ïa ka jingitynnad ka jylla.
U la ong ruh ba na ka liang ka sorkar jylla kan ym hun tang ban shu bei tyngka ban mih ka shap ha ka jersey jong ka hynrei na ka liang jong u kum u Myntri Rangbah u la ïakren ruh bad ki bor pynïaid ban wanrah noh ïa ka shlem (base) jong kane ka club sha Nongbah Shillong. Shuh shuh u la ïathuh ruh ba lada kaei kaba u la ïakren kan ïaid beit kumba thmu ynda ka don kano kano ka jingïalehkai jong ka kan sa long beit ha Nongbah Shillong.
