Rem ka Meghalaya ha ki jingïalehkai T20, pynthut u slap ïa ki U-19

Shillong, Risaw 14 : Ki ar tylli ki kynhun ïalehkai cricket T20 jong ka Meghalaya ba kynthup ki shynrang kiba ïalehkai ha ka T20 jong ka Syed Mushtaq Ali Trophy bad ki kynthei kiba ïalehkai ha ka lympung Senior Women’s T20 Trophy ki la shah rem ha ka jingïalehkai hynne ka sngi Thohdieng. Katba ha ka liang ka kynhun ïalehkai U-19 Vinoo Mankad Trophy jong ki shynrang pyrshah ïa ka Rajasthan la hap ban pynsangeh noh na ka daw ka jingshah pynthut ha u slap.
Haba phai sha ka ka jingïakhun T20 jong ki shynrang, ka Meghalaya kaba la jop ïa ka jingkynting pisa ka la kam ban tied nyngkong pyrshah ïa ka Karnataka ha Mullanpur, Punjab ha kaba ka la buh ïa ka thong ba tang 89 ron bad duh noh ïa ki 8 wicket.
Dei u Lerry Sangma ula ïoh ban kamai bun ron na baroh da kaba kamai 34 ron na ki 25 bol da kaba khyrwit ïa artylli ki saw ron bad ar tylli ki hynriew ron. U Yogesh Tiwari u la ïarap kamai 22 ron bad u Raj Biswa da 11 ron.
Ka Karnataka kaba la wan ban beh ïa ka thong ka la pynliem ïa ka Meghalaya da 9 wicket. Ka Meghalaya kan pynkhreh pat ban ïakhun sa ïa ka Maharashtra ha ka Sngi U Blei.
Haba phai pat sha ka T20 ki kynthei kaba la long ha Bangalore, la pynïalehkai noh tang 5 over shilliang. Ka Andhra Pradesh kala jop ïa ka jingkynting pisa bad kam ban kawang bol nyngkong.
Ka Meghalaya kabala tied nyngkong ka kamai tang 21 ron bad duh noh 4 wicket. Haba wan beh ïa ka thong ka Andhra Pradesh kala lah ban pyndep tang hapoh ka ar over khlem da hap wicket. Ki thei ka Meghalaya kin ïakhun pat sa ïa ka ïa ka Odisha ha ka sngi U Blei.
Katba ha ka lympng Vinoo Mankad Trophy, ka jingïalehkai hapdeng ka Meghalaya pyrshah ïa ka Rajasthan na ka Group C la pynslem noh na ka jingshah pynthut ha u slap.
Haba sdang biang ka jingïakhun, ka Meghalaya kala jop ïa ka jingkynting pisa bad jied ban kawang bol nyngkong. Ka Rajasthan ka kamai 87 ron bad hap 4 wicket shuwa ban hap biang u slap ha kaba la hap ban pynsangeh noh shisyndon ïa ka jingïakhun.