Maham ka HNPF ban pynïaid ïa ki kali na Jowai lada ym maramot ïa ka surok Jowai By-Pass

Jowai, Nailar 28: Namar ka jingsniew shaba palat jong u surok By-Pass na Thadlaskeiñ sha Saw mer (Mihmyntdu), kaba la buh jingeh ïa ki kali ba ïaid ne utei u surok uba la dap sa tang da ki thliew ki syar ha shi lynter, na ka liang ka Hynñiewtrep National People Federation (HNPF) West Jaiñtia Hills kala maham tyngeh ban phah pynïaid noh ïaki kali ki mator na u surok ba rung lynba ka sor Jowai lada ym maramot shuh ïa u da ka sorkar.
Lyngba ka kyrwoh ba la phah da u Organising Secretary ma Lamphrang Papang ka seng kala kren shai ba ka dap ka jingbitar haduh katta kata ban ïohi daka ki jong ki khmat ïa ka jingeh jong ki paidbah nongleit nongwan na une u surok NH-6, uba lah ruh pynïasoh ïa kiba bun tylli ki jylla jong ka thaiñ shatei lam Mihngi (North East).
Kane ka jingsniew shaba palat jong u surok Jowai By-Pass da ka jingdon jong ki thliew kiba heh kala buh jingeh ïa ki kali bad don ki por ba ki hap hapoh ki thliew bad sahkut syndon, la ïathuh ruh ki don bun ki kali kiba la ngat ha kane ka jingjïa tang na ka daw ka jingsniew palat u surok.
Wat la une u surok u don hapdeng ka jingsniew da ki snem mynta, hynrei na ka liang ka sorkar kam shem la shikhia ban maramoh bad la shu eh sah beit kumto hapdeng ka jingsniew katba nang mih ki sngi.
Shuh shuh ka seng ka ong lada peit bha ïa u surok kala long kum u surok khlaw bad ym long shuh ban ïaid ki kali ki mator, ha kajuh ka por ka kyntu jur ïa ka sorkar ba kan shim khia ïa kane ka jingeh lym kumta ka seng kam bynse ban leh da kaba tyngeh.