Shillong, Nailar 28 : Ka MeECL Progressive Worker’s Union (MePWU) kaba dei ka kynhun jong ki nongtrei MeECL ka la pynbna ba kin sdang biang ïa ka jingïakhih jong ki naduh lashai ka sngi, ka 29tarik kaban bteng pat haduh ka 31tarik.
Ha ka kyrwoh khubor ba la phah da u President ka Union Bah Mantiphrang Lyngdoh Kiri la pyntip ba ka Union ha ka jingïalang paidbah kaba long ha ka 20tarik mynta u bnai da kawei ka sur ki la mynjur ban pynlong biang da ki prokram ïakhih da kaba pyndeng lama iong ha baroh ki ophis jong ka MeECL bad ki jaka treikam jong ki naduh ka 29 haduh ka 31tarik jong une u bnai bud pat sa ka jingïakhih da kaba shong kyllaiñ myngor naduh ka 05tarik Nailur haduh ka 16tarik Nailur naduh ka por 11:00 baje mynstep haduh ka por 3:00 baje janmiet.
Na ka liang ka Union ka ong ruh ba ki jingdawa ba hakhmat ba ki buh ka long ban pynskhem noh ïa ki nonghikai Casual kum ki nongtrei ba pura bad ruh ban pyllait noh ïa ka arrear.
Ka kyrwoh ka ong ruh ba lada kitei ki prokram ïakhih kim urlong, kum ka Union ryngkat bad kiwei pat ki kynhun ba do ha ka CCORMAU kin sa ïa syllok lang ban ïa kren pat na ka bynta ba pynïaid shakhmat ïa ka kam.
