Nongpoh, Nailar 26: Ka Hynniewtrep Youth Council (H.Y.C) Umbir Unit ha ryngkat ka HYC Ri-Bhoi District mynta ka sngi kila leit ban ai jingïarap bad noh synñiang ïakawei ka skul shnong kaba don haka shnong Umbir ha Ri-Bhoi namar ka jingeh kaba ka ïakynduh bad ka jingbym don ki lad jingïarap wat tang ki ben skul ban shong ki khynnah.
Naka liang ka seng ka lah ïarap da ki ben bad ka duli buh kot sha katei ka skul Umbir LP School naka bynta ba kin ioh ban pyndonkam ba ki khynnah skul ki ioh ban shong bala aiti da u Bah Hercules Suting General Secretary jong ka seng sha ki bor pynïaid skul.
Haba ai jing kren ha katei ka sngi na ka liang ki nongïalam ka HYC ka lah ïaroh shibun ïaki nongïalam shnong jong ka Umbir kiba iohi jngai na bynta ka lawei ki hep kiba rit namar ka jing seng ka shnong Umbir ïa katei ka skul kaba la ai jing myntoi shibun ïaki long ki ba duk ki bym lah ban kotbor ban leit ha ki skul shimet.
Kane ka jing iohi jngai jong ki ka wanrah shibun ka jing kyrkhu namar ki khynnah ba leit ha katei ka skul kim don kam satia ban siew bai skul bad ka seng ka kitbok ba katei skul kin mih shibun ki khynnah ki khlur ba tyngshaiñ bad kitbok ba ka skul kan nang iai kiew na ka por sha ka por.
Naka liang ki nongïalam shnong ka shnong Umbir kila ai khublei ïaka HYC bad u la ïathuh ruh ba kum ka shnongka mad shibun ki jingeh ban pyntyllun ïa katei ka skul bad donkam shibun ki lad jing ïarap namar ïa ki tulop ki nonghikai ki siew na ka shnong bad shibun ki jingdon kam bad ki jinglut jingsep ki hap ïatrei shitom na ka shnong namar kim pat ioh ki lad jingïarap naduh ba ki seng ïa katei ka skul.
