Lah ban pait arliang ka party UDP ha Umsning Constituency lada bakla ka jingai tiket election 2023
Nongpoh, Nailar 21: Wat la ka party UDP haduh mynta kam pat pynbna paidbah ïano kan ai ïa ka ticket na ka bynta ban ïa khun ha kane ka election 2023 na Umsning Constituency bad kumba paw pat shabar ba la ïa kren paidbah ka don ka jingïakhun kaba jur na ka bynta ban ïakhun ban ioh ïa ka ticket ka party ban aireng ha kane ka election 2023 na Umsning Constituency.
Kumba long haduh mynta, ki kyrtong kiba la paw shabar ban ïa aireng ha kane ka election ki kynthup ïa u Bah Primson Makdoh u ban aireng na ka party HSPDP, u Bah Jason Sawkmie Mawlong, uba dei u MLA ba mynta na ka party NPP, u Dr. Celestine Lyngdoh na ka party Congress bad na ka party UDP haduh mynta ym pat tip shai ïa u kyrtong u ban ïa khun na kane ka party.
Katum ka khubor ba la ioh lum, la ong ba ki don ar ngut ki Samla Rangbah kiba ïa khun ban ioh ïa ka ticket jong ka party UDP, kine ki kynthup ïa u Samla Donkupar Sumer, uba dei u Vice Presdient ka UDP Ri Bhoi bad Presdient ka UDP Umsning Constituency bad uwei pat u dei u Samla Sunshine Makri, uba dei u President ka Umsning Constituency People’s Forum (UCPF) bad uba la pan ticket pat na ka party UDP.
Haba kren halor ka ticket na ka UDP na Umsning Constituency, kumba long haduh mynta ki kyrtong kiba paw bad kiba kwah ban ïa khun na ka party UDP ki dei tang u Samla Donkupar Sumer bad u Samla Sunshine Makri.
Ka tyllong khubor ba la ioh lum kumba la ïa kren paidbah ka paw ba ïa ka ticket ka party UDP ka kham noh sha u Samla Sunshine Makri, wat lada um dei u nongïalam ba pura ka UDP bad dei halor kane ka nongrim ka jingïaleh ban ioh ïa ka ticket ka dei hapdeng u Samla Sunshine Makri bad u Samla Donkupar Sumer bad lada bakla ban ai ticket khlem da ïaid katkum ki kyndon treikam ka party u Samla Donkupar Sumer u lah ban mih noh na ka party UDP ryngkat ki hajar ngut ki nongkyrshan ka UDP bad kane hi ka la pai shai ba ka don ka jingpait arliang hapoh ka party UDP lada bakla ïa ka jingai ticket khlem da ïaid katkum ki kyndon treikam ka party UDP. Kane ka dei katkum ka tyllong khubor ba la ioh lum da u Nongthoh Khubor halor ka jinglong jingman ka party UDP ha Umsning Constituency.