Sa ha thaiñ khappud leit maramot surok u ma Nehimaya Tyngkan lem bad ki nongshong shnong

Jowai, Nailar 21: Hadien ba lahdep maramot ïa u surok leit bri leit lyngkha ki paid nongshong shnong ka thaiñ Iooksi bad ïa u surok naduh Laskeiñ haduh Lad Mooshrot, mynta ka sngi ki paidbah nongshong shnong ka thaiñ Psiar bad Khatkasla kila hiar ban maramot sa ïa u surok naduh na Wah Myntang haduh Wah Wyrjiang (Psiar).
Ïa kane ka jingmaramot pynbha ïa utei u surok la ïalam da u ma Nehimaya Tyngkan bad ha ryngkat ki paralok nongkyrshan jong u bad ki paidbah nongshong shnong ka tei ka thaiñ.
Naka liang ki paidbah nongshong shnong ka tei ka thaiñ kila pynpaw ïaka jingkmen ïakatei ka jingshimkhia utei u samla rangbah ban ïaleh ban pynbha ïa utei u surok katkum ka jinglah jong u.
Kitei ki nongshong shnong lyngba u Waheh Shnong ka shnong Psiar la pynpaw ka jingsngewburom haduh katta katta ïa u ma Nehimaya Tyngkan halor ka jinglehbha bad lehsbun jong u ban pyllut pynsep naka bynta ban pynbha ïa u surok ïa uba ngi lah mad jynjar baroh shikatta ban leit ban wan, bad kila pynpaw ba kim sngewlah shuh ban siewkylliang daka pisa ïa utei u samla rangbah hynrei ngin pyrshang ban da kiwei pat ki lad ban siewkylliang ïa u khamtam haki jingïaid lynti bad ka jingthmu jong u.
Katba u Waheh Shnong ka shnong Khatkasla pat ula ong ba ngi sngewburom haduh katta katta ïa u ma Nehimaya Tyngkan halor Kane ka kam lehbha jong u bad ngi kyrmen shkem ba un nanglah shuh shuh ban lehbha haki kam ban pynbha pynmiat ïaka imlang ka sahlang.
Katba naka liang ki nongñiah Kali kamai katei ka thaiñ ruh dakajuh ka sur ki la pynpaw ïaka jingkmen ba ki la khamsuk ka leit ka wan watla ympat ioh da u surok uba paka ruh.
Kane ka jingmaramot ïa utei u surok ka long shisha ka jingkyrkhu ïaki paidbah nongshong shnong ka tei ka thaiñ khamtam ïa kito kiba pang ba shitom namar ki hap ban leit shaduh sha Jowai ban ïoh ïaka jingsumar.
Halor kane ka jingeh naka liang u ma Nehimaya Tyngkan haba ai jingkren u la pynpaw ba u angnud shisha bam leh ïa ki kam ba bha na ka bynta ki paidbah bad kane kadei ka sienjam kaba lai ha kaba ula ïohlad ban pynbha ïa ki surok kiba sniew hapoh katei ka thaiñ.
Ula ai khublei ïaki paidbah, ki nongïalam shnong bad ïaki nongkyrshan kiba la kloi ban ïa mih naka bynta ban maramot ïa u surok kiba long u budlum ka roi ka par bad ka ïoh ka kot u paidbah.
Ula ong ruh ba ki paidbah kim dei ban sngewphylla ïakane ka jingmaramot surok jong u dakaba pyrkhat ba u shu pynbiej elekshon ne kumne kumtai, hynrei ki dei ban kynmaw bad ban bishar bniah ïaki Kam babha kiba ula lah pyrshang ban leh katkum ka bor la palat 7 Snem mynshwa bad wat haduh mynta ka khylliapmat ruh nga dang bteng ïaki Kam babha.
Shuh shuh ula ong “ki jingïarap jong u naka bynta u paidbah kan ym kut tang katne bad kane ka jingpyrshang naka bynta u paidbah kan dang bteng shuh shuh wat lada jia ba u rem ne jop ruh, namar ka kam ïarap paidbah kadei ka kam kaba nga snewtynnad eh bad nga sngewnguh ruh ïa U Blei namar katba nga dang lehbha ïaki baduk ba kyrduh katta U Blei u nang kyrkhu ïanga” la pynkut ma Nehimaya Tyngkan ha ka kyrwoh khubor.