U Bah Dasakhiatbha Lamare u la trei shitom bha

Nongpoh, Nailar 12: Ki nongïalam ba hakhmat jong ka National People’s Youth Front, Mawhati Block mynta ka sngi kila mih shakhmat ban pynshai halor ki jingshah kynthoh u MLA ka Mawhati u Bah Dasakhiatbha Lamare ba um shym la trei bha, khamtam haba ïadei bad ki surok bad kiwei kiwei ki kam pynroi ha Mawhati Constituency.
Haba kren shaki lad pathai khubor mynta ka sngi naka liang kitei ki nongïalam ba kynthup ïa u Bah Hilary Shadap President, Pynbhalang Syiem Working President, Bah Nicolas Malai General Secretary bad kiwei kiwei ki la ong ba u Bah Dasakhiatbha Lamare watla ula trei shibun ki kam hynrei u dei u ba shah kynthoh tam namar ka jingbym lah ban ïaishah jong ki paidbah ban pynurlong khamtam ïaki surok ba kongsan bad ba donkam eh jong ka Mawhati Constituency.
Kila pynpaw ruh ba kumba long mynta ka sorkar kala dep ban mang pisa haduh 3 tylli ki surok ba kongsan haka thaiñ Mawhati ba kynthup ïa u surok na Liarbang sha Sabuda ba jngai kumba 10km bala mang haduh 18.5 klur, u surok na Khyndewso sha Jingkieng Umkhen bala mang pisa haduh 20 klur ba jngai kumba 10km, bad u surok na Umsning sha Sonidan ba jngai kumba 40 km bala mang pisa haduh 114 klur ba shen yn sa sdang ban trei noh ïaka kam.
Kila pynpaw ruh ba ki nongmihkhmat naduh mynshuwa kim lah ban pynurlong ïa kitei ki jingangnud jong ki paidbah khamtam ki surok hynrei dei ha u Bah Dasakhiatbha Lamare u ba la shimkhia ban pynioh skhim naka bynta ban shna bad siangrong noh shen ïakitei ki surok ba kongsan bad ba donkam tam haka thaiñ Mawhati.