Ba shah bat ka Kali kit Masi ha ki Doctor ka tnad veterinary, pynrem ka seng ki Nongotdoh bad ka RBWA

Nongpoh, Nailur 05: Ka Butcher Association of Meghalaya bad ka Ri Bhoi Welfare Organization mynta ka sngi ki la pynpaw ka jingsngewkhia halor ka jingshah pynthud ki Nongotdoh Masi ha ka tnat Veterinary na Ri Bhoi, ha kaba na ka liang ki Doctor na ka tnad Veterinary ki la wan bat ïa kawei ka Kali kit Masi ba thmu ban pyndonkam tang na ka bynta ka jingshohdoh ban pyndap katum ka jingdonkam jong ki paidbah hapo ka jylla.

Kane ka jingjia ka la jia hynnin ka sngi ha Umsning, ha kaba la kynnoh ba ki Doctor na ka tnad Veterinary ki la wan ban bat ïa kawei ka Kali kit Masi ba u trai nongotdoh masi u thied hi na Umsning da ka jingthmu ban pyndonkam tang ban ot doh masi ha iew ban pyndap katkum ka jingdonkam ki paidbah.

La ïathuh ruh halor kane ka jingjia, ba kitei ki doctor na ka tnad veterinary ym tang ba ki la wan bat ïa Kali ba kit masi bad ki la rah ruh ïa Kali bad Masi sha Police Outpost ha Umsning da ka jingthmu ban register case, ha kaba kum ki nongotdoh ba pynbiang ïa ka doh ha ïew katkum ki jingdonkam ki paidbah ki da sngewkhia halor kane ka jingjia.

Haba ïa kren bad ki Lad Pathai khubor mynta ka sngi, u President ka Butcher Association of Meghalaya, u Bah Esron Marweiñ bad u General Secretary ka Ri Bhoi Welfare Organization, u Samla P. Jones Kurbah ki la pynrem jur halor kane ka jingleh kitei ki doctor na ka tnad Veterinary, ha kaba wat ïa ki masi ba thied na ka la ka jong ka jylla ki kloi ban wan bat ba khang bad katba ki Muit kiba wan na kiwei ki jylla ki shu tuid sha ka jylla khlem da leh ei ei bad kumba paw bad tip paidbah ha ka jylla ym don hi ruh kita kiba bam ïa ka Doh Muit.

U Bah Esron Marwei, President ka Butcher Association of Meghalaya, u la pynpaw ruh ba ka seng kam lah ban pdiang ïa kine ki jingleh ki Doctor ka tnad Veterinary, namar kum ka seng na ka por sha ka por ki ju ai ïa ka jingïatrei lang bad kane ka tnad sorkar na ka bynta kiba bun ki kam kiba ïa dei bad ka Association bad ka long pat kaba sngewsih ba wat ïa ki Nongot Doh Masi na ka jylla ki shah pynthud pynban wat ïa ki masi kiba ki thied na kane ka jylla bad ym kiba wan rah na shabar ka jylla.

U la buh ruh ka jingkyrpad ba na ka bynta ki nongot doh masi na ka jylla, ka tnad veterinary lane ka sorkar kam dei ban pynthud ïa ki nongot doh masi ka jylla, namar ba ki masi kiba ki thied ki dei hi tang na ka jylla ha kaba kim ju ioh shuh ban thied masi na shabar naduh ba la pyrkhing bha ka aiñ jong ka Assam kiba ïa dei bad ki mrad bad mynta pat wat ki masi kiba thied hi na ka jylla la shah pynthud ha ka tnad Veterinary.

Shuh shuh, na ka liang u General Secretary ka RBWO, u Bah P. Jones Kurbah, u la ong ba ka seng ka pynrem jur halor ka jingshah pynthud ki nongotdoh masi na ka jylla bad ka seng kam lah ruh ban pdiang ba ïa ki nongotdoh masi kiba thied hi ïa ki Masi na ka jylla ki shah pynthud ha ka tnad Veterinary bad katba ki Muit pat kiba wan na shabar bad ba ym don hi ruh kata ka jingbam dohmuit ha ka jylla la shu pynlait laitluid khlem da teh kyndon ba kum ka seng lada dang shah pynthud ki nongotdoh masi na ka jylla kam banse ban leh pat da kumwei ïa kiwei ki mrad kiba wan na shabar khamtam ka Muit kaba don kata ka iew ha Ri Bhoi bad khlem ki nongbam dohmut pat, u la bynrap.